曹眾曾經喺舞台劇扮演過鄧麗君，前日佢去咗台北縣金山鄉金寶山墓園，喺鄧麗君嘅墓地「筠園」上香同埋獻花。曹眾喺墓前跪咗好耐，佢一邊飲泣，一邊用國語向台灣傳媒講話：「我不全然因傷心而哭，我只是惋惜！她是這樣美好。」
鄧麗君九五年過世，呢八年嚟，曹眾幾次想去台灣拜鄧麗君，但次次都陰差陽錯去唔成，今次終於可以一償心願。曹眾獻上玫瑰同百合，佢話問過鄧媽媽，鄧麗君生前最鍾意呢兩種花。
曹眾喺墓地逗留咗一陣，佢話同鄧麗君講咗好多心底說話。之後佢喺墓園一棵吊滿小木牌嘅樹上面，睇吓各地歌迷寫嘅思念鄧麗君字句，突然佢拎住一塊木牌大嗌：「唉呀！這是我在香港寫的，歌友會把它送來台灣掛在筠園，沒想到真給我找着了。」
小木牌上面寫嘅「但願人長久」，字迹亦已開始模糊，但曹眾眼泛淚光說：「我雖然現在才親自到筠園，但我的思念與祝福，原來早就送到她的身邊了。」
童愛玲早排結婚冇耐就宣布有咗BB，佢因為狂食補品，𠵱家體重急升到一百九十磅，個肚重大到好似人哋佗雙胞胎咁。童愛玲話佢會繼張栢芝之後，為卓悅擔任纖體代言人，所以生完之後要積極減肥。𠵱家幾乎個個女星都一人揹一個瘦身廣告，究竟呢個年代嘅女仔，有冇人係唔減肥㗎？
李玟（CoCo）前日喺台灣為今個星期喺內地舉行嘅演唱會排舞時，唔小心扭親隻腳，重喊到哇哇聲，嚇到成班人即刻送咗佢去醫院。𠵱家CoCo要扶枴杖先可以企起身，內地主辦單位亦第一時間打畀CoCo問佢有冇事，但點知CoCo一開口就話：「腳傷可以坐輪椅唱！」最後CoCo都要求咗主辦單位將演唱會延期舉行。
二人女子組合2R噚日喺紅磡為「東方美學節」做頒獎嘉賓，問到兩姊妹滿唔滿意自己身形，Race話：「我想再高啲同瘦少少，因為我重有啲BadyFat。」身邊嘅Rosanne亦話：「我好鍾意食嘢，但希望可以瘦啲。」好彩最後兩姊妺都算知足，佢哋話：「算喇！樣靚嘅通常其他地方都唔會太完美嘅。」
何韻詩、鄭中基同梁漢文噚日去咗旺角Neway卡拉OK出席新店開幕儀式，佢哋同楊千嬅重可以每人有三間主題K房，噚日就以人形紙牌貼上房中作為揭幕。千嬅返咗內地拍戲冇嚟，咁就由佢個緋聞男友鄭中基代為完成。何韻詩早前到陝西探訪小朋友，佢話：「嗰度環境唔好，但啲小朋友好開心，又熱情。」
