杜汶澤年輕時因為豪賭，在一夜間輸掉所有，結果要連夜逃往台灣避債。阿澤為了跟爛賭父親劃清界線，毅然改掉原有的姓和名，叫「杜汶澤」，靈感來自當時一匹短途快馬「澤汶渡」。今日的他比當年更有本錢，變得不再執着贏，「呢個係賭術至高境界」阿澤說。
性格主宰了一個賭徒的命運，若是懼鼠如虎，根本不可能贏大錢，要賭就要賭得狠，才有機會一擊即中。這個道理杜汶澤應該體會最深，他曾因豪賭輸掉數百萬元，結果漏夜逃往台灣。這個代價雖然大，但賭徒天生認為「有賭未為輸」，今時今日的阿澤雖然已戒了賭錢，但他坦言其人生仍然是繼續「賭」的運作，只是今日的本錢較當年大很多。
阿澤日前接受本報專訪時說：「其實𠵱家我做乜嘢都係賭，好似做唔做呢個訪問，拍唔拍嗰套戲，乜都係賭一鋪，只不過係我了解到個本錢愈大，贏嘅機會愈多。賭孤寒錢係最慘，落注嗰時會心慌慌；本錢大，賭嗰時會鬆手啲，我今時今日最大嘅本錢咪係我唔恨贏，呢個係賭術至高深境界，我冇嘢輸唔起。藝人成日都要諗自己好好，你估係紳士咩？真係唔得咪返去麗晶（洲際酒店）做侍應，我又唔係未做過。人就係咁永遠要擺脫自己嘅出身，其實改進自己先係最重要。」
杜汶澤棄用原有名字，連身份證也改為杜汶澤，為的是跟爛賭父親劃清界線。「杜汶澤」的由來是因為一隻叫「澤汶渡」的短途快馬，當年贏盡不少重要賽事，璀璨卻短暫，至於阿澤真名是甚麼，嚴刑拷問他也不肯透露半句。他不明白為何人總要擺脫過去，為何自己又自相矛盾呢？阿澤說：「呢個係我情意結，我唔想我下一代跟我老竇姓。至於點解唔跟媽咪姓，因為我都唔想我媽媽曝光，畀人知佢姓乜。呢個心情你好難明白，但我真係冇可能原諒佢（老竇）。」
阿澤續說：「如果我係背棄自己嘅出身，我唔會出書爆咁多自己嘢。名都可以改得，即係人都可以改，呢樣嘢真係要讚人民入境事務處，只係畀幾百蚊，就可以重新做人。」
重新做人後的阿澤自夥拍了吳君如擔任電台節目主持後，片約機會接踵而來，一套《無間道》儍強一角，更為他帶來金像獎「最佳男配角」提名；今年書展又以六百比七十的fans，人氣大勝謝霆鋒。阿澤可覺得自己目前很紅？他笑說：「我梗係唔夠紅啦，紅嗰啲叫劉德華。人有條件限制，我天賦係得咁多。但我自己似一個侍應生，係觀眾嘅侍應生，招呼吓佢哋，扮鬼扮馬講吓笑咁，就算要我一世做綠葉我都唔會介意。」