秋風送爽，一群先天下之憂的小朋友，意識到秋天是最易發生火災的季節。所以一早約齊人馬，整裝待發往上水消防局參觀。目的除認識各種消防車及消防工具外，最重要還是裝備自己，提升防火意識及應變能力。準備好的話，就隨小小消防急先鋒「BiBoo」出發！
記者：小扁玉 攝影：猩神
逢星期日出版
甫到埗，消防叔叔就帶我們參觀平日與他們並肩出征的消防車。消防員除咗救火外，水浸、山泥傾瀉、困𨋢等搶救人命的事情，通通都要出動。所以消防車也因應工作種類而有不同的類別。上水消防局中，就有3架兼負不同任務的消防車：
（1）泵車：我哋見得最多，可以接駁街喉，然後泵水向火災現場救火。
（2）大搶救車：救火救人都用得着，不過主要還是救人，如山路迷困、困𨋢等都出動此車。故車內架生有齊救生衣、爆破等多種救人工具，而呢架車重係新車嚟㗎！
（3）37米鋼梯車：一見車頂有條咁長嘅鋼梯，就知呢部係專責於外牆拯救被困火場者的車輛。鋼梯除37米高外，還有52米及最新型號的梯台車3種。
既然每架車都各司其職，內有乾坤。咁我哋就精選每架車內不同的用具，考考你知不知那是甚麼東東，從而增加你的小常識。
小朋友難得與消防叔叔近距離接觸，個個都成了問題兒童：
Q：火災嗰陣，係咪唔可以搭𨋢？
A：係呀。若果有煙由門隙滲入屋，就要閂埋門喺屋企採取措施保護自己。但若果走廊冇煙，就要離開單位，將門關上，然後走向最接近嘅樓梯逃生，千祈唔好搭𨋢。
Q：如果樓梯都好大煙咁點算？
A：嘗試找沒煙的樓梯逃生。假如不能使用任何樓梯，在情況許可下應返回住所，或往其他住戶敲門，直至找到躲避處。要記住遇上濃煙時，應在煙之下爬行，因為接近地面嘅空氣會較清新。
Q：咁走唔甩，困喺屋企要做啲乜？
A：用膠紙密封門周圍、通風孔及氣槽，並將濕毛巾放在門底。若仍有濃煙滲入屋，就盡快走入沒有煙的房間，關門及封好膠紙，打開窗讓空氣流通，然後掛上被單之類，等消防員嚟救你。
