響剛過去嘅德國法蘭克福車展上，奧迪車廠展出咗備受注目嘅全新S4Cabriolet開篷跑車，新車除造型誘人外，一台4.2公升V8DOHC引擎嘅強勁輸出，更教人一試難忘；相信當新車在港推出時，又會瞬間成為車迷追捧對象呢！
雖然驟眼望落去，呢款全新奧迪S4Cabriolet嘅造型與現有A4開篷版本相近，但當細心留意下，不難察覺到新車嘅鬼面罩上貼有S系跑車徽章、雙出式跑車尾喉及18吋S系跑車專用合金胎軨連235/40R18高性能輪胎組合，從而令人一望而知其身份。
全新奧迪S4Cabiolet係以一台4.2公升V8偈作動力核心，不但馬力輸出達344匹，響引擎處於3500rpm時，已能發出高達41.8kgm嘅扭力峯值，匹配一套6前速手波或6前速Tiptronic半自動波箱，無論起步加速都可有強而有勁嘅表現；與此同時，由前輪四連桿及後輪多連桿所組成嘅跑車化懸掛系統，響經過強化嘅底盤輔助下，行車循迹性之高，絕能予人莫大信心。
至於車廂布局方面，新車則與現有S4硬頂型號一樣來得甚具跑味，除用上承托力十足嘅跑車座椅外，另外重換上S系跑車獨有嘅三幅式真皮跑車軚環，當然唔少得重有設備齊全嘅中控台組合啦！另外，廠方更為新車加裝有多項安全設備，如多個安全氣袋、伸縮頭枕等等，從而確保車上乘客安全㗎！
