杜汶澤二十二歲結婚，兩年後離婚，之後曾與三級女星顏仟汶拍拖，愛情路上歷盡數段沒有結果的感情，直至今日留在他身邊數載的田蕊妮，杜汶澤坦言自己是一個易動情的人，但他卻厭倦了經常轉換女朋友的感覺。
阿澤說：「年紀細時冇辦法，貪新鮮，但年紀大咗最好唔好成日轉，真係好煩㗎，重要同佢講一次我嘅崎嶇過去。鍾意一個人好易，但要同一個人相處係好難，我喺娛樂圈成十年先搵到大塊田（田的諢號）咋。」
去年阿澤曾許下諾言，若與田蕊妮一同贏取金像獎最佳男、女配角，便會三喜臨門，即時迎娶女友，承諾雖然未有兌現，但阿澤今日仍然視女友為結婚對象，只是要結婚的衝動已過，他說：「真係要再有一個衝動先再諗，雖然有人覺得我唔尊重婚姻，但我係咁，鍾意結就結，唔鍾意結就唔結，況且𠵱家我哋感情穩定，佢治到我㗎。」
阿澤心目中的田蕊妮都「幾惡」，所以十分順從對方，而田蕊妮亦有一套對付他的方法，阿澤笑說：「佢成個擺出嚟嘅姿態係唔驚我『沙沙滾』，我幾驚佢，所以會自動報告行蹤，佢知道我有幾多錢，我使多咗要有合理解釋。但佢唔係真係太惡死，係我自己怕啫，我對佢係一個尊重，係我經過咁多失敗先有嘅一個體會。」
杜汶澤自認是一個招積的人，但他身在娛樂圈卻覺得這行很煩，理由是這行的規矩是「紅不准囂、霉不准嬲」，他不忿地說：「我真係見過好多紅人私下係好囂，但喺人前又扮到好謙虛；又好似見到一啲好霉嘅人明明係好嬲，但又唔可以出嚟怨。既然呢個圈係咁，我咪跟條form去行，盡量有禮貌，唔寸記者，開工唔遲到，聽導演話。」當日訪問阿澤後，記者要返報館趕稿，阿澤即令其HipHoplook的司機直駛將軍澳工業邨，在娛圈混了十多年的他，似乎踏上正軌，「跟住條form行」。
撰文：馮美茵 攝影：林德雄 場地：KYOTOJOE
