天氣轉涼，買衫買鞋轉季都係時候，唯獨手表無分季節，要買的理由似乎更加充裕。擁有過百年歷史的上海街老字號表舖亨得利，近日從倉底摷出一批全新Deadstock，全部都係六、七十年代的機械表，當中有上鏈亦有自動表。全部以街坊價發售，最平$150就有交易，乜季節都係BestBuy！
記者：張銘恩 攝影：陳陶鈞
Model：Phoebe&Frida（RichStrategy）
冇講笑，大大隻好款機械手表全部割價低至百五蚊，平過女人街老翻，雖然並非甚麼出名大牌子，部份是由已經銷聲匿迹的「山寨廠」出產，但全部是七十年代瑞士製品，現今仍行走如常，款式有型又特別，買多幾隻換款襯衫絕不為過。
圓形漸變表面
圓形漸變表面款，有啡色及綠色選擇，雖則標明防磁防水，但始終係老爺表，佩戴時最好莫挑戰其極限。$150
飛碟表面
當年非常流行的飛碟凸面表面，採用「冧巴」操兵字，十分型仔。$150
70's電視表面
七十年代電視初興起，很多人對此趨之若鶩，所以這類表形的手表均被稱為電視表面，幾有代表性。$150
膠帶黑金剛
此款號稱「黑金剛」，備星期、日曆顯示，特別之處乃不用鋼帶而用膠帶，而且表面中間位置特別切割，看上去更立體。$150
女裝日曆表
女仔人家唔想戴咁大隻表，呢款啱晒，細細個銀色表面又夠斯文，更有日曆顯示功能。$150
要潮不妨潮到盡，古老嘢不只能襯懷舊Look，正如以下兩隻閃閃生輝的金表，就絕對啱襯HipHop粗鏈大吊墜閃鑽Look，夠誇得來唔怕同人撞款。
Tugaris金表
中文名「得其利是」，除閃石刻度重有中文星期顯示！$550（原價：$920）
花邊黃金俠
方形黃金俠，有特色花邊面及日曆顯示，百五蚊勁抵！$150（原價：$380）
簡約黑白雙煞
唔太誇又有啲懷舊Feel，呢兩款就簡單得來又古典。$380（原價：$780）
銀面小三針
Mewa美華自動表，小三針設計，特色是採用雙數刻字。$480（原價：$980）
細個時阿媽曾喺櫃桶底摷出隻灰舊的斗零表，嗰時諗：「嘩！乜以前啲人咁奇怪，咁鬼細隻表，唔靚又唔實際！」直至𠵱家先發覺斗零表其實精緻如首飾，看時間實是其次，戴上後那份優雅的感覺才是令女士們沉迷的原因！
羅頓批花帶
曾叱咤一時的Metias羅頓表，此半人手製造的斗零款，外層包白金之餘更用了批花帶，現時此技術已近乎絕迹，罕見。$880（原價：$1,500）
綺年華五星上將
別名「五星上將」的名表Eterna綺年華，以利用五粒波子自動運行的自創技術而聞名表壇，所以其自動表特別煞食。
左下：不銹鋼自動表，備日曆顯示。$2,600（原價：$5,800）
右上：包黃金鮑魚殼自動表，備日曆星期顯示，而且包金厚度比現時市面製品高出一倍，所以有「永不褪色」的保證。$5,500（原價：$8,500）
雖然以上機械表隨便抽一隻都可能大過你同我，但若果保養照顧得宜，唔係講笑，質素好的機械表隨時可以多行幾十年，所以今次一定要捉住縱橫表壇二十多年的負責人麥姐，醒大家兩道保養機械表的散手。
第一招：上鏈慢慢來
不少人以為幫手表上鏈時唔好太盡，否則會好易壞。據麥姐所講，其實上得盡並非問題，最緊要係慢慢來，逐下逐下上，千祈咪心急先唔會拉壞表鏈。
第二招：莫長期冷落
雖然大家可能有後宮三千，但機械表同人一樣，切忌將佢打入冷宮太耐，要不時（約半年）戴吓，讓內部機件活動活動，咁佢就會更聽你話喇。
售賣點：亨得利（23889125）
油麻地上海街358號地下