日本騎呢富婆叶恭子同叶美香兩姊妹，同電視台合作嘅《第一屆叶姊妹二世選舉》後日就出街，唔知係咪外間反應比叶姊妹預期差，而且參賽者啲質素更加令恭子同美香搖晒頭，佢兩個決定搬晒自己屋企啲富貴shopping戰利品出嚟showoff，希望可再吸引到啲貪錢靚女報名。
前兩日叶姊妹就用七個LV篋搬啲衫褲鞋襪上TBS電視台，嚟展示佢哋「shopping即係偶遇」嘅理論。其中一件佢哋最自豪嘅衣物，就係十五年前買落嘅紫黃色皮草，當年買都要成五百萬港紙，家姐恭子話：「一件衫着成十五年，都唔算好貴啫！」但我羅拉屈指一算，攤開一日都要九百蚊港紙，加上皮草夏天着唔到，抵唔抵大家心裏有數，或者佢哋覺得錢要使咗先係自己嘅。
其次令我羅拉最開眼界嘅，就係叶姊妹每晚都會開反省會，研究吓喺電視節目講錯乜嘢，而陪伴佢哋嘅點心，係值五千幾蚊嘅紅酒加魚子醬，嘩！豪到咁呀？