近日好多工業股都出現疲態，莫非真如金手指所言，芬佬減持工業股轉投地產股？
好似泳衣股德發集團（928）咁，8月份大股東大手減持後，股價一度急跌，但之後就出現強力反彈，原來兩大基金光頭佬同金手指坐咗好多貨，但消息曝光之後，德發股價不但升唔穿1元，之後更拾級而下，噚日又跌1.14%，收0.87元。
小初諗極都唔明，照計光頭佬揸住11.3%，金手指揸住7.41%，而且又唔覺佢哋有減持，因乜原因德發股價會無力再上，成交重愈來愈縮，於是走去問經紀黃。
經紀黃同小初講古仔，佢問小初記唔記得鞋股之王裕元集團（551）揸住好多德發，市場重一度傳出同德發傾緊認購股票期權？但事實係，當芬佬增持德發之際，裕元已成功減磅。
一位同裕元有密切關係嘅人士向分析員講，裕元呢鋪沽出德發，足足賺咗270萬美金咁多，正因為有大戶出貨，所以德發股價走勢偏軟。
慕容小初