消費BestBuy：
NBA開鑼新人王球衣最搶手

新一季NBA喺今個月28號正式「開咧」，餓波已久嘅NBA球迷呢排係時候行動啦！因為唔少新季NBA球衣已經陸續返貨，NBA新人、轉會球員嘅新波衫今個月開始「登陸」本港。值得留意嘅係Nike最後一季為NBA推出球衣……重等?!今年唔買等幾時呀？

記者：何善華
攝影：伍慶泉、陳盛臣
Models：Denny、豪（RichStrategy）

安東尼更勝勒邦占士！
以往開鑼前大家嘅焦點都離不開球員嘅轉會市場，但今年卻一反常態，NBA新人的球衣市場成為美國的傳媒焦點，當地炒得火熱嘅NBA新人，效力克里夫蘭騎士嘅LebronJames被捧到「天上有地下無」，不但球衣好賣，連明星卡的銷量都高踞榜首。James之風吹到香港，唔少學生哥都跟風照捧呢位仁兄。但係另一NBA新人，今年由大學轉到丹佛金塊的CarmeloAnthony絕對可以挑戰James的新人地位，至少Anthony係由大學所屬直升NBA球隊，比起James今年喺高中跳升NBA行列，其心理質素及作賽經驗應該更有保證。

美國奧運隊「夢幻六隊」
球衣新登場
啱啱完成嘅奧運男子籃球外圍賽，「夢幻六隊」以全勝姿態進入明年嘅奧運會，其新款奧運隊球衣亦於日前搶閘登陸，球衣顏色一如以往，深藍色為主；但作為美國「夢幻隊」嘅Fans，唔買番件捧吓真係對唔住自己！

售賣點：ShootingFive
地址：旺角皆旺大廈1203室
電話：23951633
營業時間：2:00pm-9:30pm（周一至周六），4:00pm-8:00pm（周日）
備註：收現金、EPS、VISA及MASTER

Nike唔玩NBA　Reebok接棒
此外，Nike於今年NBA球季結束後正式完結10年的球衣推廣合約，換言之Nike將會最後一年為NBA球會推出新球衣，而今年推出嘅Nike'sNBA球衣將會「絕版」，有買趁早。同埋大家不妨見證一下歷史，今年嘅球衣將有一個怪現象，就係同一間球會分別會有Reebok及Nike贊助商各自推出球衣，認真相映成趣。

Nike轉攻「復刻市場」
不過Nike今年又玩吓新花式，推出不同系列的「復刻版」球衣，好似1957年湖人球衣，球衣顏色及線條都模仿番當年的設計；目前只有1966年費城76人版、1982年北卡（UNC）佐敦版及1957年湖人版的復刻波衫有售；新澤西網隊、紐約人及波特蘭拓荒者於10月中先至返貨。而Nike亦會推出其他「昔日NBA明星」喺UNC嘅當年球衣，好似伊榮、碧比、皮雅斯等。

小貼士： 點分57年版？
點知件球衣係57年版？好簡單，每件復刻版球衣嘅「衫腳」牌仔上，都標明「57」字樣，表示是1957年的版本，以後買復刻版球衣就可以清清楚楚知道件球衣嘅歷史喇！

小貼士： 球員名字喺「冧巴」下面！
件件復刻版球衣都好似有個賣點咁，呢件費城76人1966年版的球衣都有個別開生面嘅地方，就係球員名字唔係𠵱家慣常見到的，刻在球員號碼的上面，而是倒行逆施地刻在「冧巴」下面，都算幾趣怪。