墨西哥女星莎瑪希恩（SalmaHayek）同拍拖多年嘅愛德華羅頓（EdwardNorton）分手，真係令人跌晒眼鏡。我羅拉一直都覺得，愛德華係近年最出色嘅荷李活演員之一，唯一衰在爛滾，竟然令女友莎瑪搭上個《變形俠醫》同《我要嫁得好》嘅男角佐斯魯卡斯（JoshLucas）。𠵱家佢兩個已火速發展，前日莎瑪重第一次好大方咁拖住男友見記者㖭。
莎瑪希恩近年成為實力派女星之外，亦做埋導演，佢首次執導嘅電視電影《TheMaldonadoMiracle》，前日喺美國比華利山舉行首映禮。我羅拉記得上個星期，莎瑪同男友佐斯魯卡斯一齊去祝賀安東尼鶴健士（AnthonyHopkins）喺荷李活星光大道上打手印嗰陣，表現得「私私縮縮」，似乎重想收埋吓先。不過，前日兩個人就突然好大方，十指緊扣咁拖手出現。
其實無他嘅，前日係莎瑪執導嘅處女電視電影首映，本身套片只係得老牌影星彼得芳達（PeterFonda）有啲知名度，莎瑪拖男友出嚟，咁咪吸引啲記者影相囉，重唔大收宣傳之效咩！
聽講佐斯已帶莎瑪見家長，佢媽咪重對莎瑪幾滿意㖭，認為佢會係一個賢妻良母，至於成日俾阿媽催婚嘅莎瑪，反而同啲老人家講，要搵個擁有渾圓性器官嘅猛男先肯嫁，唔知佐斯係咪真命天子呢？