飲食人誌：<br>FoodCourt搞Crossover海南雞×壽司

飲食人誌：
FoodCourt搞Crossover海南雞×壽司

以法式釀料釀入中式燒鴨而成嘅「御前燒釀一品鴨片」、將海南雞混合壽司製法嘅「宮廷一口雞」，完全係Crossover，呢啲菜式都夠晒新穎夠晒刁鑽，創意無限之餘亦要配合高超廚藝兼勁長製作時間。而最出乎意料嘅係供應呢幾味菜式嘅，並唔係咩酒店級中菜廳，而只係一間新開設喺FoodCourt裏面嘅燒味店。

記者：馬慶武　攝影：黃子偉

食物款式選擇多、價錢平又方便，係FoodCourt吸引食客之處，不過大多數存在喺FoodCourt內嘅食肆，經營方式都太過快餐化，無乜個人風格。
今次御膳登陸太古廣場FoodCourt就係希望可以改變呢種FoodCourt嘅快餐形象，所以除咗請嚟前麗晶酒店麗晶軒嘅燒味部大廚超哥監督燒味質素外，重特別創製出多款出位菜式。另外同期開業嘅重有LittleMiso，呢間係日本料理店Miso嘅FoodCourt版本，食物價錢較平之餘，Miso嘅大廚亦都嚟咗LittleMiso坐鎮兼設計新菜式，當中最正就係連日式早餐都可以喺度食到。

準備工夫最重要
曾經喺酒店中菜燒味部當大廚嘅超哥話𠵱家嚟到位處FoodCourt嘅御膳，工作模式改變咗好多：「最難適應係呢度嘅工作『步速』，因為御膳標榜嘅係食物質素，所以食物嘅製作程序都要嚴格執行，但係出菜數量就要多好多，尤其午飯時候，真係停唔到手。」為咗令效率提高，超哥話準備工夫最重要，不過亦唔會因為咁而變得好似做快餐咁規律，忽略體貼嘅服務：「有時見到Order食燒味嘅係外國人，都會盡量迎合佢哋嘅口味，雞同鴨都會畀胸肉。有時啲客想啖啖肉，燒味上碟時都會起埋骨。」

■超哥話唔會為咗快而減少製作菜式嘅工序：「好似御前燒釀一品鴨片嘅工序可謂超級繁複，即叫即做一定做唔切，所以每日只會做一定數量，賣晒就無。」

御膳
電話：25228796
地址：金鐘太古廣場L1樓128B號舖　
營業時間：7:30am-10:00pm

堅持用新鮮材料
至於LittleMiso，由於係FoodCourt價錢，感覺上菜式嘅種類同埋矜貴程度都唔及Miso，不過關師傅就話用嘅材料一樣新鮮：「大多數快餐或者FoodCourt嘅食肆都只會用雪藏嘅海鮮，但係LittleMiso就堅持用新鮮料。」不過講到必試之選，都係要早啲嚟食個日式早餐，因為日式料理店早極都要午市先開舖，一般餐廳好難食到，希望體驗日本人食嘅早餐，就非要到LittleMiso不可喇。

叫「海南雞壽司」可能會更貼切，日本飯糰上放咗一片連雞皮嘅海南雞胸肉，而雞肉上嘅就係酸薑同薑茸，入口充滿雞油香又有壽司嘅口感，唔點Wasabi點辣椒油更有風味。至於叫一口雞係因為可以一啖一件，啱晒儀態第一嘅女食客。(御膳)

釀喺燒鴨裏面嘅係蘑菇、蛋白、Cream、鴨肉碎等材料，據關師傅講呢個係法式釀料，用中式燒鴨包住，口感及味道都比齋食燒鴨豐富得多。(御膳)

■關師傅話LittleMiso雖然無刺身呢類高成本菜式，但其他菜式無論用料嘅新鮮程度或烹調方法，都同Miso一樣咁講究。

雞皮燒得又香又脆嘅日式照燒雞扒配上Wasabi醬汁，清新得嚟夠刺激。另外套餐除配上沙律，還可選配白飯、湯拉麵、湯烏冬或綠茶麵，一個Set都夠飽肚。(LittleMiso)

LittleMiso
地址：金鐘太古廣場L1樓128C號舖
電話：25228353
營業時間：7:30am-10:00pm

超抵食嘅便當，主角日式照燒牛肉腍而多肉汁，重有天婦羅海老同炒野菜，加埋足足6件加州卷，一個人真係未必食得晒。(LittleMiso)

呢Set早餐份量都唔細，用甘笋、雞蛋、雜菌、三文魚肉煮成嘅五目粥香而清淡，送鹹鹹哋嘅小魚乾食就最啱，另外套餐重包括有菠菜做嘅漬菜、日式素菜、菜壽司及日本煎茶一杯。(LittleMiso)