前幾日，賭王何鴻燊兩仔爺喺澳門開嗰間摩卡角子娛樂坊開幕，可算係小賭王何猷龍踏足「娛樂事業」嘅處女作。開幕嗰日，小賭王重話好有信心做賭王接班人。坊間即刻有所揣測，究竟何鴻燊會搵邊個做佢旗下賭業呢一瓣嘅接班人？
若果大家記性唔差，應該記得舊年，賭王踢咗十姑娘何婉琪出「澳門娛樂」董事局後，就委任咗女兒何超瓊入局，當時大家都估，Pansy（何超瓊洋名）將會成為賭后，接手家族大生意。
八方噚日見到賭王，當然追住問呢件事，點知賭王認為何猷龍開角子老虎機場，「奀到極啦，濕濕碎。」至於係唔係意味由何猷龍接手賭業？賭王話：「佢梗係要用我嘅牌至有得開，我哋𠵱家只係畀個牌准佢開，好濕碎。」
八方當然再問接棒問題，賭王笑笑口話：「嗱，你哋睇到我重幾fit吖，使乜咁快。」咁即係幾時呀，「五年內啦，你再問我啦。」
講開又講，究竟係由阿仔做小賭王，抑或由阿女接手做賭后，賭王似乎真係未諗定，因為八方問起佢同MGM美高梅合作單嘢，佢就話由何超瓊去傾，𠵱家雙方主要係傾緊啲法律問題。似乎賭王嘅賭業王國爭奪戰，暫時由賭后領先。
傳真︰2623-9278
電郵︰