《天外魔境》一向係RPG遊戲嘅台柱，並曾經締造遊戲史上第一部以CD-ROM為媒介嘅RPG，而之後喺PCE-SCD推出嘅《天外魔境Ⅱ：MANJIMARU》，就更以遊戲內容豐富，加上由久石讓製作音樂，更係風靡一時之作；最近HUDSON將呢隻經典RPG遊戲，重新移植至PS2之上，老Game迷固然話必買重溫，新Game迷想知乜嘢叫經典中嘅經典、遊戲性重於一切，今次要學嘢嘞！
記者：許福合
對天外魔境嘅Fans，《天外魔境ⅡMANJIMARU》由畫面到玩法一定覺得熟口熟面，事關設計上承襲咗前作風格同系統，故事內容亦更加豐富詳盡。
遊戲一開始用咗類似卡通嘅動畫，而進入遊戲後，先會喺主角嘅村莊收集資料，並且好快就有同伴加入，不過喺未到達指定劇情前，同伴並唔會喺戰鬥時幫手。玩法基本上仍按照傳統RPG方程式，貯經驗升級、收集情報、買武器道具等，而畫面與現時新Game相比，雖然唔夠華麗，不過若你旨在重溫《天外魔境》，就絕對唔會失望。
故事一開始就要從火多白川村嘅卍丸家，主角卍丸會以勇者身份歷險，所以地圖設計得非常清楚，並會分別以藍及紅色標示出重要地點，加上對話漢語用字較多，唔識日文玩都容易搵到行走路線，唔驚迷路。另外重要提吓大家，喺遊戲目錄內，有一個活動話劇寫真館，當中收藏咗《天2》同《天3》嘅動畫片段，讓玩家可以隨時欣賞喺遊戲中曾經睇過嘅動畫劇情，老Game迷見到一對好感動。
好多玩家都會覺得，玩RPG遊戲精髓絕對放喺戰鬥系統之上，《天》亦都唔例外，每當喺村落外走動時，經常會受到野良犬及狂犬等敵人攻擊，除咗可反擊外，還有道具及劍法可用，攻擊力較高外，亦會有出招畫面配合，雖然已經係多年前嘅設計，但𠵱家睇番都一樣令人熱血沸騰。
另外，在遊戲進入戰鬥模式時，會見到敵人底下有條生命線，受傷就會減少，要特別注意判斷形勢，不過條生命線用紅色，唔起眼，起初還以為一灘血呢。要貯足夠經驗值升級，一開始比較困難，因為敵人逃走容易，要花一啲時間升級，直至可一刀將敵人斬殺，遊戲就會暢順得多。
售賣點：DreamStore（東方188商場）
查詢電話：25753285
香港代理：龍勇有限公司
