是非多多嗰間娛樂公司，雖然有唔少偶像歌星藝人喺手，但旗下好多歌星都私下埋怨經理人部門個揸弗人好有問題，安排工作檔期經常出現混亂，不過因為佢識服侍老闆，老闆就好睇重佢，搞到啲歌手敢怒不敢言，所以唱得嘅都頂唔順諗住走人，而最近另一位靚仔歌手都俾佢激親，重當場鬧佢。
靚仔歌手咁嬲，除咗因為嗰個揸弗人除咗做嘢混亂之外，重因為揸弗人喺事前明知個行程會有變動，但係又唔通知靚仔歌手，等佢以為個行程冇問題，照做自己要做嘅嘢，去到現場先知改變晒，搞到佢要走嚟走去，激動之下，就走咗去鬧個揸弗人一大餐。
呢個揸弗人平日好巴閉，除咗老闆之外，冇乜邊個歌手敢得罪佢，靚仔歌手份人向來好直，嬲起上嚟就鬧咗先算，馮仁昭都幾欣賞佢呢種不畏強權嘅性格。
羅慧娟最近得到一間機構招呼佢去澳洲旅行，羅慧娟喺澳洲旅行嗰陣，佢就住喺一間五星級酒店，聽講當時加拿大女歌手CelineDion都住喺嗰度，只不過羅慧娟同佢緣慳一面，羅慧娟重話好享受呢個假期，梗係啦，有得免費旅行喎！
名模楊崢噚日喺金鐘太古廣場，為一個法國品牌示範冬季新裝。佢話有意去法國留學，馮仁昭問佢幾時實行計劃？楊崢話：「去過嘅朋友話要一至二百萬先夠，屋企早排裝修用咗一大筆錢，𠵱家又要由零開始儲過，都有排等。」咁多錢？咁就真係有啲渺茫喇！
陳司翰近排去咗內地宣傳佢之前拍嘅台灣偶像劇《又見橘花香》，早幾日上海旅遊節搞咗個「形象大使」選舉，就請咗陳司翰做表演嘉賓，大會重要求佢一定要唱《又》劇嘅主題曲《Girl》，又安排十一位着住性感紅衣嘅女仔幫佢伴舞，陳司翰就話好尷尬。其實舞蹈員伴舞有乜好尷尬，又唔係拍親熱戲，唔使咁薄皮呀？
Shine最近幫咗個服裝廣告做代言，噚日馮仁昭去睇佢兩個拍廣告，廣告商爆料話搵Shine之前，佢哋都考慮過幾個藝人，但最後揀咗Shine，因為又南（左）個樣似金城武喎！咁天佑似邊個呀？廣告商就話：「佢識打籃球，好啱我哋嘅牌子形象呀。」廣告商重話木村同長瀨都成日着呢個牌子嘅衫，廣告商都冇揀到佢哋，可謂畀足面Shine！
陳冠希（Edison）為電影《無間道II》去咗台灣宣傳，點知熱到暈咁滯！原來佢之前接通告話台北會有東北季候風，重係天氣寒冷咁話，一落機至發現好熱，即刻將褸同長靴除低啦！Edison重換埋短衫短褲，佢話：「咁樣做嘢都涼啲！」Edison因為下個禮拜就要去英國拍片，擔心到時《無II》上映時做唔到宣傳，所以先同余文樂到台做簽名活動。
