資金繼續流入，金管局兩日內沽出15.45億港元，以穩定港滙。黑客同阿虎講，現時市場內至少有10個對沖基金炒緊港元升值，買入嘅港元會流入港股及期指市場進行炒作。呢類對沖基金食開大茶飯，所以唔排除港股會出現一個中長期單邊大升浪，可能會升到無人敢信亦無人敢跟，即使下周出現「秋官效應」，充其量只令大市略為回吐。
現時香港經濟未確認全面復甦，傳統基金唔敢大舉入市追貨，但只要熱錢繼續流入炒高，香港經濟好快就會出現真正復甦，到時傳統基金入市，然後散戶瘋狂入市，炒到咁上下，美國可能因美元貶值而出現通脹，跟住就係出現利率上升周期，對沖基金才會伺機反手造淡，但造淡之前的升浪，隨時可以玩一年半載。
大市噚日由滙豐（005）與中銀（2388）等銀行股帶動，恒指升62點，收報11608，成交186.8億元。二三線地產股亦發力炒上，其中天德地產（266）升9.5%，華大（201）升10%，大昌（088）升11.5%。
i師傅話升得有道理，因為政府唔賣地，又吊高補地價金額，大地主若要增加土地儲備，可能要向小地主收購，增加小地主手頭物業的變現能力。由凱聯（105）講明想賣凱悅酒店物業，漢國（160）亦可能以高價出售鑽石山香島中學地皮，已可反映呢項因素。𠵱家大地產股如新地（016）股價較資產淨值有溢價，相反唔少中小地產股仍有50-60%折讓，單係炒折讓幅度收窄已經有排炒。
阿虎