美股周三大升逾2%，周四初段跌唔落後，杜指及納指再升0.2%收市。
港股好友噚日亦學到足，恒指初段跌唔落即反覆挾上，午市再創今年新高11652，最多升過106點，尾市稍為回吐，報11608，升62點。
恒指本周4個交易日上升319點，升幅2.8%。周線圖技術雖強勢，但亦有可彈之處，9RSI昨收77.20，相當超買，9月初升至77.39時，下一周即出現調整，跌287點。
另外周線9RSI背馳訊號仍未消除，所以下周港股就算出現調整亦十分正常，特別是熱錢流向出現改變或無以為繼。
港股近日雖然屢創今年新高，但一般散戶及炒家未見熱昏頭腦，對市場反應異常冷靜。近幾日港股升勢及成交主要集中於藍籌股及部份國企，早排炒得火熱的二三線股，普遍無跟大市上升，多以橫行或微跌為主，亦反映現時的散戶較以往精明。日後當藍籌調整至較合理水平，大市再無因熱錢撤走而突然急跌的風險時，二三線股反而可能有較佳表現。
在大量熱錢湧入買實力股時，唔買藍籌通常無錢贏，但好多已經貴到買唔落手，雖說在熱錢支持下，股價可以超買再超買，新地（016）便是一個好例子。但其實買中贏錢只是好彩，不要當自己好眼光。
講起新地，噚日股價回吐3.6%，收65.50元，仍屬大漲小回的走勢。不過噚日沽空成交急升至1.72億元，好淡愈鬥愈激，若好友再贏，新地要見70元以上相信唔難，若淡友成功反撲，回到大摩目標價54元亦非無可能，總之，有貨要攬緊安全帶。
趙飛雲