醫生W嫁女，廣派請帖，特登約左丁山食飯，送上請帖，客氣成咁，到時唔出席都唔得。
醫生W平時忙於睇症，食飯都唔得閒，今次到診所診病之前，唔食三文治，擠壓一啲時間嚟派帖，盛情可感。W係專心嘅醫生，生活好正常，近乎沉悶，但最近有啲衝擊噃，原來有人想佢出馬參加競選噃。
醫生W話：「自由黨唔知點解，最近好積極，招兵買馬，拉攏中產階級，居然有人勸我入黨，參加十一月嘅區議會選舉。大概佢哋以為我在新區開辦診所十幾年，人緣唔錯，有啲號召力也。」左丁山就猜測到點解，因為七月一號之後，自由黨民望急升，超過民主黨、民建聯，梗係認為機不可失，打鐵趁熱，希望搵到人參加區議會選舉，如果戰果理想，明年自由黨參加立法會直選就有計喇喂。
不過搵中產專業人士參選，難度好高。如醫生W話齋，佢自己等同手作仔，手停口停，如果萬一當選，成日去咗區議會開會，佢邊度可以收到診金，做議員嘅機會成本好高啫。專業人士之中，律師最有時間參選，搵一兩個合夥人睇檔，助理律師做嘢，自己開完會就返去律師樓睇文件、簽字，仍然搵到食，做醫生、大律師就唔掂咯。如此說來，自由黨拉攏中產專業人士參選未必成功，但自由黨正值氣勢如虹，做多啲事，此其時也。