呢幾年除咗好多香港人北上搵食之外，連唔少日本公司亦北上搵機，遊戲界亦唔例外，好似KONAMI、光榮等軟件公司亦一早有分公司喺上海同北京，而且重中文化咗唔少大作內銷PC市場，好似Capcom嘅《BIOHAZARD》（內地、台灣譯作《惡靈古堡》），就曾創出數十萬片銷量之數！比起香港得嗰一、二萬銷量真係天同地比，所以眾公司亦一直積極打入內地市場。日本老牌任天堂宣布10月中，喺上海、北京同廣州三地開始發行N64簡化版「神遊機」，為咗杜絕翻版，將採用FlashCard形式儲存遊戲，而遊戲方面亦會全部漢化上陣，銷售方面則會由任天堂提供器材，在指定店內下載，遊戲下載定價48蚊人民幣，而主機則498蚊人民幣。雖然暫時國內反應麻麻，但始終係一個好開始，而一直傳嘅PS2國內版亦相信好快登場。
文：打機鐵人
前排日本推出嘅5字頭型號主機終於有行貨，型號係SCPH-50006，咁亦代表咗用iLINK對戰遊戲嘅終結，幾部主機Link埋一齊玩嘅情況要係網上先再有。
今個星期絕對係得《天外魔境II》重造版擔得下旗，而且$300有找真係唔貴。而PS2重有隻《ENERGYAIRFORCEAIMstrike》就賣$310至320左右。