民主女神余若薇唔單止魅力迫人，更被視為「人肉吸票機」，噚日八方經過立法會門口，見到一大班綠衣人排住隊同Audrey（余之洋名）合照，原來係民主黨嘅區議會候選人邀請柯德莉為佢哋造勢。向佢上支香，求佢保佑埋自己。
柯德莉話，今次有好多人搵佢拉票，但好似媽祖咁，要睇吓啲善男信女夠唔夠誠意，平時有冇積福，重有個樣衰唔衰，若然平時打家劫舍開嘅，就無謂嘞。暫時只有民主黨、前綫同公民起動嘅參選者有幸可以借到柯德莉。噚日柯德莉重特登着咗套青BB嘅哇沙池裙，襯晒民主黨嘅綠色徽號，郎情妾意，盡在情侶裝中。
其間有個內地旅遊團經過，知悉柯德莉係大律師兼立法會議員，唔理佢係文匯大公定性嘅反中敵人，爭住想合照，當正柯德莉係自由行景點，不過民主黨班友自己都大排長龍，而且自己形象又幾中產，所以當然唔畀內地同胞埋身啦。
（圖）Audrey成個明星咁款，民主黨候選人似小fan屎排住隊等影合照。
傳真︰2623-9278
電郵︰