雖然晨早流流爆咗單期指經紀行爆煲事件，但美股急升近200點，本港樓市受惠於投資移民計劃，樓價預期繼續上升，加上大市資金充裕，港元滙價強勢持續，好友大舉搶攻，恒指勁升316點，收報11546，但成交198億元，未創新高。不過，根據上次金管局沽港元買美元的經驗，熱錢會在第二日流入股市。金管局噚日再接相等於3億幾港元的美元沽盤，換言之，港股今日可能會繼續上升。
新地（016）、長實（001）與恒地（012）噚日勁升6至8%，今日斷估輪到銀行股上升，中銀香港（2388）要特別留意，此股屢創新高，已無阻力可言，而且又係人民幣結算行大熱，淨係呢個消息已經有排炒，加埋憧憬樓價上升，之前嘅壞帳撥備有望撥回，按揭貸款或會增長，樣樣都對中銀有利。
四通電子（409）額外發售可換股債券1.7億元，每股行使價0.52元，復牌後股價逆市下挫4.5%至0.85元。其實，今次發債是上次發行5000萬元換股債的延續，呢批總值5000萬元的債券於7月14日完成發行，在10月中就可以行使沽出，行使價同樣係0.52元，現時股價高出行使價咁多，壓力在所難免。
不過論慘情，四通點都唔及新怡（1094），不但失去賣盤消息嘅支持，公司重大拿拿攞3500萬元（相當於新怡有形資產淨值46.37%），收購資產淨值只得33萬元的貫華網絡科技，令到公司基本因素出現重大變動。呢單deal神奇到嚇壞人，股價復牌後大跌23%。新怡明明係鞋股，做乜咁多手走去玩科技呢！
阿 虎