好彩經紀陳叫小初等漢寶（228）完成新主入股後先至好沾手，否則小初噚日見漢寶個勢咁靚，一定追入買貨，分分鐘坐艇。
漢寶噚日雖然大升24.75%，收0.126元，但全日最高見過0.16元，一個唔小心就好易買貴貨。
另外，小初噚日睇報紙，見到搞展覽嘅建發國際（223），不滿貿易發展局與民爭利，計劃明年搞夏季貿易展，將影響建發的文具禮品展。小初睇見有件咁嘅事，對建發深表同情。但經紀黃就唔係咁講，佢話小初同情建發，又有乜人同情佢同埋金手指？
小初問此話何解？自從有CEPA之後，建發亦受惠，可以去內地搞展覽會，公司前景看好，故此金手指密密增持，至8月份已經揸咗11.23%建發股權，股價亦由1元升上1.40元，經紀黃見到有勢跟風買入。
點知建發上周一起停牌搞供股，傳聞2供1，並以超勁大折讓低於0.30元供股，隻股到𠵱家重未復牌。經紀黃話若落實布供股，真係唔知供唔供好？
慕容小初