田北俊（圖）呢頭話訪京成功修補自由黨同中央關係，𠱁番國家，嗰頭返港就開始變臉。何以見得呢？原來自由黨同立法會內其餘兩大黨一直有個慣例，但凡委員會主席位有空缺，三個主要政黨都會坐低傾掂佢。
不過今次周梁淑怡取行會棄內政委員會主席一職，由劉健儀頂上，劉健儀空出嘅交通事務委員會主席位，民建聯早前向自由黨表示，該黨嘅劉江華有興趣做，兩個黨私下一拍即合，冇預民主黨份。
民主黨中人好不滿，覺得田少喺最後一刻獲曾慶紅接見，真係聽晒曾慶紅發出嘅「最高指示」，全力同「愛國愛港」嘅政黨交媾，幾時有喜就未知，不過𠵱家已經當民主黨冇到。
田少係咪真係咁諗，重要睇多陣，不過田少近來嘅開心得意蒲晒面，有如初戀咁，同中央共浴愛河。佢噚日同八方講，自由黨冇點做宣傳，都多咗四十幾個黨員，因為多咗人認同佢哋嘅「中產」形象喎。下星期自由黨會開記者會，介紹新黨徽。
傳真︰2623-9278
電郵︰