薄扶林貝沙灣二期，近期風頭一時無兩。個盤早排搞咗個李雲迪鋼琴演奏會，聽講，唔少大學教授，或者對生活講求品味嘅買家，被呢類活動打動，齊齊入市。
最近推出嘅第八座，半數單位為四房雙套房單位，因為銀碼大，發展商再搞多次晚會催谷銷情。
喺貝沙灣現址售樓處，明晚有著名男高音莫華倫獻唱。同場重有最新秋冬時裝表演，由專門為Ball場名媛設計服裝嘅時裝設計師何國鉦（Dorian）負責。據知，佢早前曾經為貝沙灣做Show，電盈主席李智康對佢嘅設計讚不絕口。
另外，為嘉獎代理咁努力，李智康日前頒獎畀中原員工，包括何兆棠同曾令智，重有專責海怡半島嘅劉文勝。
何兆棠話，佢哋一早將貝沙灣定為豪宅指標，重成立咗隊精通英文、普通話同其他外籍語言嘅「外籍客戶經紀群」，部署推銷，先至有咁好成績。
𠵱家打工真唔易，除咗自己要賣力之外，分分鐘連屋企人都要出動埋。
星展銀行推廣部有個同事，為咗令佢哋嘅信用卡登記熱線令人留下深刻印象，就帶咗自己個八歲仔仔，去幫中文頻道錄音。蘭西噚日一知道，就打電話去聽吓，覺得都唔錯。選擇咗中文頻道後，就即刻聽到「Hello，我係搞鬼小天使」，重講咗一大段說話，介紹佢哋個HALLOWEEN活動，唔單止好聽，重好專業。
聽銀行公關講，有間大電訊商推廣部嘅朋友，都想借「小天使」幫佢哋錄音，不過，最終梗係「星展獨家」啦。
坐落東鐵沿線嘅又一城，得鐵路之利，喺呢個十．一黃金周，太古印咗批「又一城遊客優惠指南」，內地客只要到顧客服務處，出示護照，就可以免費得到，喺商場內超過60間店舖同食肆消費，有折扣優惠。
另外，太古又有「遊客資訊指南」送畀遊客，提供旅遊景點、交通、飲食文化、購物須知、娛樂同潮流購物情報。
本港商場店舖，為了盡量吸引內地客消費購物，真係出盡法寶。
香港仔黃竹坑工業區已規劃為商貿地帶，唔少工業地批咗做酒店。香港經貿商會會長李秀恒早於去年買入嘅偉晉同立興兩幢工廈，翻新工程接近完成，一向創意無限嘅李秀恒，將兩幢工廈重新定名為「殿堂」、「創意」，以全新面貌示人。
蘭西噚日入到去「殿堂」嘅大堂，以為入錯咗酒店。大堂採用五星級酒店設計，據李秀恒講，過去半年，佢一直駐守呢兩幢大廈，一心一意炮製商家需要嘅夢想辦公室。
改裝後嘅偉晉中心一期「殿堂」，租戶對象係商家，而偉晉二期「創意」（即係立興工業大廈），單位較細，主力吸納創業人士。兩幢大廈都有一站式服務，包括裝修、二十四小時運作，及專業酒店式服務。重有一批擁有酒店管理經驗嘅靚女為租客提供協助。
中原數據部及查冊部高級經理曾展良講，佢哋為工商舖部同豪宅部設咗個「CEOList」服務，等同事可以更容易接觸到唔同公司嘅高層，要游說佢哋買樓可以事半功倍。呢份名單由最初嘅三四萬家公司，到𠵱家已經增至八萬家，包括公司名、CEO人名同電話。佢強調全部都係從公開途徑搵番嚟嘅。
呢項服務，係用行業（六十幾個）、規模同區域嚟界分；然後同事可以透過coldcall、郵寄同e-mail三種方法接觸客戶。
另外，曾展良話，公司嘅中央數據部同查冊部合併，分行同事喺網上提交查冊申請，佢哋用電腦回覆，既可減輕查冊部同事嘅工作量，又可更快幫到同事，最重要就係減輕成本。
蘭西
電郵地址：
