英國實地測試3G威力<br>下載新聞只需五秒

英國實地測試3G威力
下載新聞只需五秒

香港3G遲遲未有得玩，令到香港條頸愈等愈長，相反遠在英國的3G就早已經開通，由專門店到攤檔都隨處可見，手機款式由摺機到直身機都有齊。不過手機款式多都未夠，最緊要都係下載速度夠快，身處英國當然要一試3G威力，以Nokia最新嘅7600測試，下載700K新聞片段都只係五秒左右，令人更期待香港3G嘅來臨。

記者、攝影：劉耀祥

PROFILE
制式：GMS900?1800?WCDMA
顯示器：65,536色?128×160?TFT
鏡頭：30萬像素　體積：87×78×18.6mm　重量：123g
功能：藍芽、MMS、JAVA、GPRS、影相、拍片、和弦、MP3
備用時間：7-12.5日
通話時間：1.8-2.9小時（WCDMA）?3-4小時（GSM）


上周在英國倫敦舉行的Nokia7600發布會上，除大Show新機之外，現場亦設有多個攤位提供3G試玩，要盡情發揮384kbps高速資料傳送的威力，當然要試盡各款下載內容，而Nokia於英國特別設立名為「FunkyPlaza」的WAP網頁，提供多種不同資訊內容。以支援XHTML格式的Nokia7600開啟「FunkyPlaza」，毋須2秒就已經可以Show晒整個版面，而再以一段約700K的新聞片段測試，整個下載過程亦只需5秒左右，比起用GPRS速度快上接近5至6倍，影像流暢度亦相當高，未有起格或矇鬆現象出現。

■「FunkyPlaza」乃Nokia編寫之WAP網頁，內容相當多元化。

■睇新聞畫面清晰，畫面夠大，睇得舒服。

高解像相三秒Send完
玩3G當然唔係睇吓新聞咁簡單，「FunkyPlaza」內更提供電影預告片、天氣報告、時裝、MV以及遊戲下載，除遊戲外全部都以VideoStreaming（串流）方式傳送。除了下載資訊之外，因為Nokia7600亦都內置30萬像素影相鏡頭，所以傳送相片亦都係3G重要一環，Send張640×480相片都只係2、3秒嘅事，絕對係快夾爽。對於玩MMS用家，就算近百K容量有聲有畫嘅MMS，都話咁易就可以Send晒。雖然香港3G仍然都係得個等字，不過Nokia嘅3G手機7600兼容現行2G制式，毋須3G網絡都一樣可以玩晒各樣功能。

■新聞：可選擇在線觀看或下載收看，悉隨尊便。

■娛樂：音樂、電影都有齊，玩盡3G高速傳送。



英國人點睇3G？

■遊戲：當然亦都唔少得JavaGame下載。

■MMS：傳送有相有聲MMS都只係兩、三秒，相當爽快。

■Lily：手機要另外畀錢買，太貴，所以冇打算會轉用3G。

■Rebecca：3G月費要成35鎊（約HK$420），若果15至20鎊就會轉用。

■Charlie：自己冇用，不過家姐有用3G，但係聽佢講接收麻麻。

■Sunny：聽過3G，但係唔清楚有啲乜，感覺好似好貴。

■Sally：未聽過3G，若果可以有好多資訊下載，唔太貴都會考慮。

■Claire：完全冇聽過3G，亦都唔知係乜嚟。

英國3G未普及
英國於上年年尾已經開通3G服務，暫時只有「3」提供3G服務，所選擇機種亦只有5款，當中包括香港都有出現嘅NECE606及E808等。不過可能由於推出時間不長，所以英國街頭甚少見到人用3G手機，當訪問當地人對3G的感覺時，部份就因為月費較貴，又或者手機價錢高昂而寧選用現行的2.5G制式。不過小記發現3G手機售價其實都係百多英鎊（約千幾蚊港紙），對香港人來說可能唔係好貴，但英國人相當習慣$0機價買機，所以就算百零鎊都覺得貴。而且小記意外地發現很多當地人對3G一無所知，甚至不知3G為何物，可見3G在英國還有待發展。