新車速報：<br>豐田AlphardHybrid新一代環保豪宅

新車速報：
豐田AlphardHybrid新一代環保豪宅

近年對汽車環保研究不遺餘力嘅日本豐田車廠，繼早前代理運嚟全新第2代Prius環保Hybrid轎車抵港後，原來近年城中炙手可熱嘅豐田Alphard豪華MPV，廠方亦推出環保Hybrid型號，新車唔止設備齊全又講究，每公里平均耗油量以廠方提供嘅17.2km/L推算，亦不過為$1.5而已，絕對稱得上係慳油呢！

記者、攝影：陳偉林　ImageGirl：Irene
逢星期一至日出版

賣相突出富魅力
呢部有別於同系嘅AlphardHybrid新車，廠方為截擊對手，除咗於車身兩邊及車尾，加有Hybrid字樣外，車頭一對Xenon大燈及鬼面罩組合，以及四輪16吋合金胎軨配搭，還有車尾高透光指揮燈及煞車燈，均較原有Alphard車系要來得醒目又有型㗎！

■行車電腦除能顯示Hybrid引擎運作外，多媒體電腦重可以用作上網購物或SendE-mail。


設備講究坐得舒適
講到車廂鋪排，三排七座位設計嘅AlphardHybrid，既有雙電趟門配搭之餘，中排重有獨立手枕同腳墊；而原廠多功能行車電腦連AV系統，重備有前後雙屏幕組合，既可監控Hybrid引擎嘅正常運作，甚至乎免提式電話亦一應俱備㗎！當然少不了重有原廠前後恒溫冷氣、雙天窗、前後獨立照明及送風口，另外重有雙安全氣袋組合㖭！

■中、後排座椅可配搭成卧鋪，最啱稍作歇息之用；尾排更可完全收摺起，從而令尾廂容量倍增。

■中排獨立飛機式座椅設計，既有活動桌几之餘，又有腳墊組合。

■新車車廂有別同系款式，座席間有大型手枕連儲物匣，刪除咗Walk-through功能。

■前排後方車頂，裝有原廠大屏幕AV系統，予人豐富娛樂及資訊。

■全新液晶體表板組合，資料豐富又詳盡。

■四幅式半皮半桃木軚環，兩旁附有音響及免提電話開關按鍵。

■全新SuperCVT無段變速自動波，可按需要選擇Sport模式，以提升扭力驅動。

■車頭及車尾分別置有三具閉路電視，遇有阻礙一目了然。


Hybrid引擎環保易操作
當啟動引擎時，全新Hybrid系統嘅寧靜度，實教人難以置信，匹配上一套SuperCVT無段變速自動波，起跑加速敏捷有力，全沒有半點受車重達2010kg所負累似的；惟走彎時卻明顯察覺得到，因應30台Nickel-MetalHydride電池橫列車底有一定重量關係，四輪避震稍嫌欠缺一份柔韌同支持力，但以日常代步嘅用途去考慮，無疑呢部AlphardHybrid可謂予人稱職滿意之感呢！



記者話：最啱日常代步
新車以一台2.4公升自然吸氣偈，匹配兩台電動馬達，並以恒式四驅傳動，車重達2010kg；惟起跑加速寧靜有力，操控跟一般車輛無異，既慳油又見廢氣排放量少，好啱日常代步用；但四輪因車重影響，舒適有餘稍欠柔韌及支持力，略遜於傳統MPV設計。

■全新高透光尾燈結構連倒車燈，好有High-tech味。

■前排手枕後方，置有雙插式咪高峯座及外插電座。

■雙天窗旁設有前後獨立照明、送風口及出入扶手。

Irene話：設備齊又夠豪
部車外形份量十足之餘，車廂設備豪華又講究，置身其中愜意又寧靜，既有前後高級AV系統連屏幕，而中間雙趟門設計，進出車廂重好方便㖭！

■新車以一台2.4公升偈匹配兩台電動馬達，以確保低轉有充裕扭力輸出。