周二晚美股唔多對辦，但昨日亞太區股市反應未算點壞，日本股市不跌反升。美股對港股嘅影響漸減，本港移民計劃對樓市又多少有啲刺激，本港樓市近兩個月已有起色。
地產股若回落，不妨細細注吸納地產股Call輪。𠵱家揀地產Call輪，比較費工夫。有大量成交嘅地產Call輪，通常都係啲定點輪、鎖定回報輪、知足輪、跨價輪等，啲數據唔易計算，一個唔覺意，買着正股升而輪價唔升嘅窩輪，得激氣兩個字。正常輪則交投唔多。
新地Call輪9001與9034，係正常輪，前者明年2月到期，輪價1.39元，負溢價0.6%，槓桿率4.5倍，後者明年4月到期，輪價1.41元，溢價0.4%，槓桿率4.5倍。
兩隻輪數據唔錯，吼低買。兩隻正常輪，缺點都係交投唔多。
恒指喺萬一點以上，屬高水位，睇淡大市嘅人亦唔少。不過，恒指Put輪值博率唔高，原因係溢價唔低。溢價十幾個巴仙，代表畀千幾點溢價，大市如果慢慢跌落去，揸高溢價Put輪未必得益，提防溢價慢慢收縮。
大市再跌，則應諗吓恒指Call輪，溢價低，唔怕輸溢價。候低買嘅對象有9870與9051。
章盛