國慶假期除咗飲飲食食外，其實冇乜嘢好搞。講到飲飲食食，經紀陳就話可以留意控股權剛易手嘅漢寶集團（228），隻股雖然未必即刻有得炒，但稍後應會見真章。
漢寶周二國慶假期前復牌，股價表現未見驚喜，反而大跌18.55%，收0.101元，但比起新大股東提出嘅每股0.05元嘅全面收購價，則仍然高出好多。
經紀陳解釋，今次收購漢寶嘅買家，與大陸其中一隻傳奇股健力寶關係密切，以往亦曾經同中聯系統（757）有過交往，佢哋今次買入漢寶，斷估唔係因為鍾意食龍蝦，又或者想搞酒樓生意。市場傳聞，新大股東在成功入主後，將有新搞作。
基於健力寶在國內曾經勁炒，而中聯早排亦炒得火熱，所以經紀陳叫小初要留意新易手嘅漢寶，但隻股本身問題相當多，上市前向大股東派股息被聯交所將軍，上市後又試過未能如期出業績，所以穩陣計，等有關問題統統解決，買殼一事正式完成後，先至考慮亦未遲。
慕容小初