十一黃金周，祖國屍爬遊客大軍二十四萬殺到，場面重盛大過《魔戒》第二集千軍萬馬嘅特技畫面。國家挺董保港，今次真係好有誠意，出力愈大，即是愈間接證實阿董係唔掂。
不過，挺董嘅極少數人士，咁都有得擦鞋，話阿董喺中港之間「斡旋」，促成「屍爬」，「居功至偉」。大佬，搞到個經濟咁嘅樣，要勞煩國家北水南調，直接搭喉狂揼血漿，十包唔夠輸夠二十包，就算搶救成功，執番條命，「居功至偉」嘅，應該係醫生、護士、院長，幾時輪到病人自己領獎牌？
講開北水南調，早嗰輪因北京沙士之禍，俾錦濤哥連同衞生部長張文康揮淚開斬嘅北京市長孟學農，國慶之日，突然有復活翻生之喜，轉任為「南水北調建設工程委員會」阿頭。南水北調，跨州過省，權力南北貫穿全國，一揸起個金牌，可謂呼風喚雨，比起以前做市長，政令不出京門，權力加碼大擴充，而且喺國慶之日宣布喜訊，擺到明係話，跟錦濤哥搵食，肯同大佬孭鑊，就有着數，過過冷河，縮埋避半年鋒頭，咁又生番。相反江主席隻頭馬張文康就到𠵱家都冇着落喎。所謂信耶穌得永生，肯孭起一身罪，為救贖人類，同天父捱義氣，釘上十字架三日咁耐，行雷閃電，就會復活嘞。
國家領導人玩政治咁神奇，阿董又會唔會醒扒學吓嘢呢？行問責制，就要炒人，呢頭炒，「瓊」乾啲水，掛喺陰涼地方吹吓風，過一陣又可以翻炒，浸味重靚㖭。西班牙有一味風乾火腿名菜，叫做SarenoHam，就係咁樣整法，如果有朋友去開馬德里睇波，記得搭佢買包西班牙Ham，返嚟切片送紅酒，嗒吓嗒吓，就會齒頰留香，味道濃過孟學農。
阿董怕炒人，皆因佢好盲目咁信奉儒家思想，認為人死如燈滅，而唔相信耶教，唔知道耶穌都只須掛喺十字架，過三日冷河；而佛教更認為生死輪迴不息。嗱，好似楊永強咁，抗沙士，唔係佢嘅強項，佢嘅優勢，係身光頸靚，講說話陰滋麻利，行出嚟，用隻手摸摸個頭，再拈起手指彈一彈衣襟嘅塵埃，講兩句殖民地港大腔嘅英文，上到北京，連吳儀見到都生滋貓入眼。
唔好講個炒字，另行成立個「婦女事務局」，叫楊少坐歪少少，阿董又毋須得罪楊少，又可以向市民交代，全港婦女重會開心到齊齊放煙花，尖叫不止㖭。嗱，呢啲就叫做政治手腕嘞。十一國慶，中央又示範同阿董上多一堂嘞，阿董睇完煙花，係咪應該北向、立正、敬禮，嗌一聲「收到」呢？
傳真︰2623-9278
電郵︰