上個月樓市火熱，代理行收入破晒紀錄，做到數嘅前線員工，佣金收入一定唔會少，隨時重可以攞埋發展商嘅獎金，認真和味。
美聯集團更加錦上添花，送股票畀做得好嘅前線員工，名額十個，包括9月佣金收入最高嘅五名營業員，同營業額最高嘅五名分行主管。
聽講集團主席黃建業私人送出兩萬股美聯股票，而新任集團顧問黃錦康，同執行董事張錦成（圖左）都會送出股票。點分法今日就有定案。黃建業話，今次係第一次派股票畀員工，除咗獎勵之外，都希望增加員工嘅歸屬感。美聯今晚重會搞慶功宴㖭。
近排美聯股價係咁升，收到股票嘅員工，分分鐘賺埋股價，可謂大豐收。只要努力，隨時有意想不到嘅回報。
大角嘴港灣豪庭發展商恒基地產，每逢假日，都會安排一批資深歌星獻唱經典名曲，營造熱鬧氣氛，又大派麥記食品畀到場人士醫肚。
呢招免費娛樂，恒基大大話話都用咗超過一年，不過橋唔怕舊，噚日下晝港灣豪庭現場又開Show，人流迫爆，驟眼睇真係幾熱鬧，烈日下依然大排長龍等睇示範單位，點知好多人入到去，眼尾都冇望吓個示範單位，就匆匆去排第二條隊攞食物，重面露滿足笑容㖭。
信和集團旗下小西灣藍灣廣場，喺9月啱啱踏入兩周年，噚日大搞慶祝活動，重邀請年輕偶像Sky、Mini-Cookies表演助興同大玩遊戲，集團執行董事余惠偉、租務部總經理陳昌傑、屋苑管理公司副總經理彭國華，齊齊出席負責頒獎。
早前為刺激商場人流量及消費意欲，藍灣廣場特別搞咗個至筍優惠商舖選舉，信和趁着商場兩周年紀念日，公布結果。冠軍BluestarExchange，提供嘅優惠係所有顧客買兩件貨品，可以同職員猜「包剪揼」，勝出後有全棉襪兩對；雙亞軍杏花樓同南灣泰國餐，前者六點後惠顧一百蚊，送人參咖啡紅豆糕兩客，後者消費滿二百蚊，有二十蚊現金優惠券，及泰式飲品。
香港過時過節都會有煙花滙演慶祝一番，所以有煙花景嘅單位頗受歡迎。荔枝角盈暉臺一位準買家，睇啱一個二座高層有煙花景嘅細單位，售價二百幾萬，趁噚日十‧一國慶有煙花放，要求實地考察，一家大細睇煙花之餘，順道睇埋樓。
長實營業經理梁焯鏗就話，盈暉臺剩番嘅單位唔多，所以可以開放現樓畀準買家睇，佢重話，今次入屋睇煙花嘅準買家，其實禮拜日已經嚟睇過樓，睇完煙花，應該可以決定買唔買。
銀行可以查閱個人客戶資料嘅正面信貸資料庫，已喺八月一號正式生效，業內人士話第日大家用信用卡都要小心啲，因為假如你有太多卡，一時唔記得遲咗交卡數，資料庫都會有紀錄可查到，卡主他日若借錢買樓，銀行審批時或有影響。
若果真係咁，就要記得準時找卡數，唔係第日買樓要向銀行承造樓按時，優惠少咗或有阻滯搞到樓都買唔到，就真係唔抵啦。
蘭西
電郵地址：
