講以前，好多人都會追捧日本AV影音產品；論現在，國產貨色嘅質素，已經逐漸拍得住日本貨，而且論創意同價錢，有時重會有好多新驚喜。最近AV場新返咗最新最強嘅國產AV產品，如二千零蚊嘅7"LCD手提DVD機、花碟照讀嘅DVD機、色差輸入14"電視機等，功能之強連好多日本機都未必做到。
記者、攝影：朱崇德
ImageGirl：Macy（SunSpot）
逢星期一至日出版
Shinco可算係國產DVD機中嘅名牌，最近佢哋新出咗一部7"LCD嘅手提式DVD機，顯示屏係使用最適合睇DVD嘅16：9。不過最吸引係個價錢，$2,580就有交易！如果比着日本機，起碼索價5千以上先有交易！
機身設計都好「潮」！圓角摺機式設計，再加埋極Cyber嘅全銀色機身，驟眼睇真係有幾分SONYNotebook感覺。機身設計都幾纖巧，厚度僅為2.6cm，攞出街周圍煲碟都好輕便！對應碟類亦夠多，DVD、SVCD、VCD、CD、MP3、CD-R、CD-RW、PICTURECD全直讀！外置式鋰電池每次充電後玩到3小時左右，都差唔多夠睇兩套電影！
早年好多人喜歡選用Shinco嘅DVD機，因為知到佢嘅機芯晶片組同光碟讀頭，都係使用SONY「膽」，耐用度同質量上有保證！
不過自幾年前，Shinco嘅DVD機技術發展成熟後，已經着力DVD技術嘅自行開發，今個星期新出嘅DVP-767，更使用了最新開發嘅第六代晶片！強喺邊？DVP-767就算面對碟面全花嘅DVD碟，佢都可以自動作出訊號矯正，照讀直播如儀！至於超靚畫質嘅ProgressScan，同環迴震撼力嘅5.1聲道輸出系統，一樣都兼收在這個纖薄嘅機身之內！不過講到型仔，都係佢個DVD碟盤，採用中檔機常用嘅「食碟」式設計，對應碟種包括有DVD、SVCD、VCD、CD、MP3、CD-R、CD-RW、HDCD及PICTURECD，不過較實際嘅係DVD+/-R都睇到，咁自製嘅DVD影片都玩到啦！
14"電視機仔通街都買到，但係玩到色差輸入，AV場中敢大膽講句，就算日本水機都好難搵到；呢部CONICCS-14DX，原籍中國大陸，但好罕見地加入色差輸入端子，用嚟做睡房機睇DVD，質素當然非一般行音頻視頻機可比擬！而且價錢一啲都唔貴，$780搞掂，你話有乜方法唔愛國貨呢！
TGTMS-601V又係一部人見人愛嘅國產AV產品，AudioCD、MP3CD、VCD全部睇齊，連液晶體線控，出外旅遊時煲碟聽歌一流。為咗簡化機身按鍵數目同控制機身體積，所有VCD嘅操控按鍵，都另外收藏在一個紅外線遙控上，以咁嘅配備加功能，都係$480搞掂，真係不得不佩服國產機嘅低成本生產能力！
好多人都有個錯覺，國產AV產品都係走低檔次路線；想玩專業啲？得！好似呢部CAYIN265Ai，屬發燒級嘅「純A類」兩聲道擴音機，所謂嘅「純A類」就係指長期處於作戰狀態，唔使點煲機，一開已經可以播放出最完美音效！
雖然係國產牌子，但基本機身所有「餡料」，都係用正外國原料；再加上佢同德國好多專做發燒機嘅影音大廠，有近10年以上嘅OEM製機經驗，所以不論技術同質量上，都達至專業發燒級水準！據10年經驗影音店員Jacky表示，「CAYIN265Ai雖然只有40W輸出，但由於屬純A類，所以總體輸出力比市面好多套裝機要高出好多，最誘人是音質同發燒級嘅『膽機』有幾分相近，感覺柔而不硬！如果買日本名牌子機，起碼上到2、3萬先有咁嘅水準！」。
(A)華仁會電器
電話：23980280
地址：旺角花園街75-77號花園商業大廈5樓及6樓
(B)永明影音
電話：23997451
地址：旺角西洋菜街68號地下