我求大俠前晚如常扭開電視機睇歐冠盃賽事，除「收費台」之外，「絲帶台」亦有直播，重發現開波前一個鐘，有個節目提到馬會足智彩賠率㖭！
據我求大俠收風，原來呢個節目首播出街，請咗幾位前香港球員，回顧上次分組賽賽事，同埋當晚有邊場賽事進行。不過，最革新嘅莫過於節目尾段，由一位女主持講述馬會足智彩各場賽事嘅主客和賠率，都算係自從賭波規範化後，第一次喺電視傳媒睇到呢類節目。
其實，我求大俠一直有留意因賭波規範化，應運而生嘅電台講外國波節目，主持重會有心水推介；電視媒體亦有賽前節目絕對唔出奇，其他頻道會唔會有類似節目出現？真係要拭目以待嘞。
英國啲傳媒話阿仙奴唔知係咪同束馬尾嘅球員撈亂骨頭，上屆俾施文累幾次，前晚作客火車頭又俾對方束馬尾嘅門將奧捷歷哥夫搞到贏唔到。施文之前替阿仙奴都攞過唔少獎，既然佢人都走咗，𠵱家喺曼城重有好開始，我求大俠認為英傳媒應該放過佢，咪再搵佢嚟講笑或做新聞。
荷蘭足總周四公布月中歐洲國家盃外圍賽主場對摩爾多瓦時，棄用曼聯前鋒雲尼斯達羅，理由係話佢不尊重教練艾禾卡特，喺對捷克換出佢時踢水樽發洩，我求大俠知道「雲佬」亦接受決定，梗係啦！對摩爾多瓦「停賽」，之後就可以喺附加賽歸隊，使乜驚？
季前最終因傷而再次錯失加盟熱刺嘅曲波，原來無聲無息之下，去咗英超球會布力般跟操，繼續追尋投身歐洲球壇嘅夢想。布力般曾經到過中國視察環境，希望打入中國市場，所以就畀曲波跟操。我求大俠都佩服曲波嘅毅力，去達成心願，真係值得香港青年人學習！
重記唔記得早年踢過利物浦嗰個哥利摩亞呀？呢位九十年代中期英超球星，因為太早成名帶嚟壓力，經常鬧出打老婆及神經失常新聞，結果喺大約兩年前，被迫「掛靴」！最近佢經理人透露口風話，呢位三十二歲嘅前國腳想復出，但全世界都知佢係麻煩友，有冇球會敢要先？