有個影帝都幾花心，雖然佢已經有個伴，但一樣心多多。最近有個老細級人馬提供個私竇畀佢玩，重搵埋人安排啲內地姑娘畀佢開心，但影帝喺性方面有啲煩惱，唔係時時都得心應手㗎，有陣時搞好耐都冇乜反應，同佢有過一手啲妹妹仔話佢表面就好正喇，但佢「細佬」就唔多爭氣。
之但係每次影帝索完可卡因，佢「細佬」就會生猛番晒，所以佢都幾依賴呢啲嘢。呢行好多明星都鍾意吸食毒品，特別係一班玩到癲嘅年輕偶像歌手就食得最勁，成班人成日一齊索，跟住就亂咁搞埋一齊，呢班所謂偶像歌手都幾烏煙瘴氣。
Twins成員蔡卓妍（阿Sa）前晚喺中環蘭桂坊出席一個美容宣傳活動時，着住tubetop，十分性感，引來唔少途人圍觀，場面一度混亂，阿Sa話：「呢度地方淺窄，人多係咁。我唔怕俾人摸，都摸唔到啲乜嘢。」對於有報道話Twins遭內地禁止舉行歌迷會，佢哋嘅經理人霍紋希就話冇啲咁嘅事。
曾華倩噚日自己一個人，揸住部平治房車去機場接機，佢喺機場等咗一陣，接咗兩位老人家離開，馮仁昭估計嗰兩位係曾華倩嘅父母。曾華倩早排同老公離婚，所以好多家庭瑣事都要親力親為。馮仁昭覺得女人獨立啲都好，起碼唔使吓吓靠人嘛！
由焦媛主演嘅舞台劇《100%激流女情》，今日喺灣仔藝術中心公演，噚日作最後綵排時，焦媛就排練咗妓女嘅自白戲。佢除咗學足北方女子口音外，重打扮到好鬼惹火，粉紅色魚網衫加同色內衣，擺出唔少性感動作，佢話：「呢身打扮係參考旺角班『姐妹』，動作就模仿各大報章副刊。」
有報道話張曼玉嘅緋聞男友、玉寶表行政總裁GuillaumeBrochard失業，噚日玉寶表公關證實Guillaume離職嘅消息，發言人話：「佢八月底已經離職，主要原因係同瑞士管理層意見不合。」發言人重話Guillaume離職同曼玉嘅緋聞絕對無關，而曼玉嘅代言人地位更加不變。
郭晉安同陳慧珊噚日喺烏溪沙拍攝無綫新劇《隔世追兇》，劇情講安仔以一部八十年代嘅手提電話同死咗二十幾年嘅父親聯絡，佢拎住道具手提電話時，愛不釋手，安仔話：「我第一部手提電話係細水壺，二手買番嚟都七、八千蚊，已經係一個月人工。」
導演張之珏前晚喺跑馬地出席一個防癌活動，提到好友林家聲嘅細仔林潤添日前燒炭自殺，張之珏話：「我知道消息後本嚟想傳真問候聲哥，但怕呢段時間打擾到佢屋企人，而且呢段時間冇乜嘢可以表達，希望佢屋企人可以團結、勇敢面對呢個不幸。」
