時富金融（8122）1供2，供股價0.25元，較停牌前報價大幅折讓76%，周二復牌後股價一度挫逾22%，低見0.83元，最後被托回1.03元收市，跌幅僅3.7%。
不過，消息就嚇親申銀萬國（218）同萬勝（376）兩隻證券經紀股，兩股分別急挫8%及9%，因為股民驚佢哋有樣學樣，以大折讓價供股集資，拓展股票孖展呢類高險業務。事實上，最近港股成交暢旺，確係證券行發圍好機會，但證券行賺錢，通常靠孖展融資賺取高息，呢類業務風險高，一旦市場出現突變，隨時會被客仔拖累損手。
ｅ莉莎話，時富金融趁機抽水用於發展孖展融資業務，如果此舉成為趨勢，即係話證券行會大開水喉，亦即意味炒家將更趨活躍，二三線股、中資股及國企股可能有排旺。阿虎有位朋友於SARS之後想話收購一間中型證券行，原本選擇相當多，價錢亦理想，點知大市短短幾個月內全面轉旺，證券行老闆當堂心雄，叫價大幅提高，已經去到買唔落手嘅地步。
阿虎日前話聽到大摩將新地（016）目標價降至38元，原來係聽錯咗，實情應係54元至啱，真係唔好意思，有怪莫怪，恕阿虎唔識世界。
財訊傳媒（205）周二突然停牌話配股。據講係先舊後新配售1.4億股，每股0.26元，而且市場重傳出配售代理第一上海已搵齊人長期坐盤。此股復牌後未必好有炒味，但可以期望公司基本因素，隨着國內開放傳媒事業而向好。
阿 虎