武俠大師金庸，自從七一大遊行之後，反23條順勢伸咗掃把頭一腳，又話公屋加租唔講法治，反手鬆多孫明揚一肘之後，跟住就同愛妻一齊北上華山，出任五大門派嘅盟主高職嘞。
金庸胸中海嶽，筆下龍蛇，華山歸來，今次議論嘅唔係咁細眉細眼嘅特區嘞，而係中國前途。
大師接受最新一期《茶杯》專訪，今次重宏觀，直頭呼籲全國人民唔好一有錢就買汽車。因為十三億人咁多，若果有朝一日人人揸架車，會有幾多污染？最弊嘅就係啲石油呢頭貴價入口，嗰頭就轉為廢氣，國家點樣凝聚國力同資源？
金庸唔係得個噏字，重身體力行㖭。上次佢返大陸上名山參觀，一樣係唔搭車，而係由幾個大漢抬轎，坐轎上去㗎，文化人嘅衣食住行品味，真係好出人意表嘅。不過若然國人照佢講嘅咁做，將來有錢最多只係坐轎，冇波子揸，又點樣吐氣揚眉呢？
金庸呢篇專訪，由陶傑執筆，重講到佢有一次去北京見胡耀邦，當面窒阿老胡㖭。爭住上京見曾慶紅嘅土共，味淨係識得一見領導人就眉開眼笑，開心到講唔到嘢，學吓嘢喇。
（圖）金庸返大陸遊覽，唔揀搭車，而走去坐轎，原來係因為環保。
傳真︰2623-9278
電郵︰