小超人李澤鉅上個禮拜一鳴驚人，計劃私人斥資四十億入主加拿大航空，過往佢多數跟老竇尾默默耕耘，好少自己行出前線，今次乜事咁勇？佢嘅發言人對加拿大環球郵報話，小超人想買加航，除經濟原因，重有一個理由，就係「愛國」。
八方好明白經濟原因，對生意人嚟講，有錢賺咪係經濟原因囉。至於「愛國」，八方就有啲疑惑。原來，小超人係加拿大人，所以佢想加航留喺加拿大人手中。呢個理由令八方諗起當年佢細佬買香港電訊嘅情形。
位發言人又話，小超人三十九歲，做咗加拿大人已經二十年，而且經常飛去加拿大，而且小超人嘅太太都係加拿大人，三個女當然亦都係加拿大人，重有，小超人識佢太太都係喺加拿大。總之，小超人非常愛加拿大。噚日咁啱係中國國慶，八方睇到呢段報道，就想起早幾日佢哋兩父子上京見胡主席……
傳真︰2623-9278
電郵︰