樂壇大姑媽艾頓莊（EltonJohn），早排聲稱想幫佢位於倫敦HollandPark嘅豪宅裝修，所以透過蘇富比拍賣行將屋裏面超過四百件私人物品掃出大門口。大姑媽呢次拍賣，前日喺倫敦舉行，重以成一千七百四十萬港紙嘅成交價超額完成，比預期多咗成九百六十萬。
查實大姑媽一向洗腳唔抹腳，佢今次點解要上至名畫，下至大床同舊床單都賣埋，心照啦。唔知係咪廣大市民知道佢莫財，競投情況相當踴躍。好似其中一幅名叫《MadisonSquarePark》嘅十九世紀名畫，就以八十一萬成交，成為四百件貨品之中最好價嘅貨品之餘，重創咗大姑媽拍賣私物嘅最高成交紀錄。
喺今次拍賣之中，大姑媽重放咗好多件德國Biedermeier古董家具，大姑媽同佢愛郎日日瞓嗰張胡桃木雙人床，就賣到二十三萬。而佢擺喺廳封塵嘅DavidLinley相框，亦賣到六千五蚊喎。雖然啲貨聽起上嚟好似件件都揦脷，不過大姑媽唔係名牌都唔用，就算全屋最平嘅燭台，都賣一千一百五十二蚊。