飲食人誌：（秋季燒烤系列二之二）<br>自己落海捉鮮瑤柱無人沙灘BBQ燒活海鮮

飲食人誌：（秋季燒烤系列二之二）
自己落海捉鮮瑤柱無人沙灘BBQ燒活海鮮

喺呢度BBQ，燒鮮瑤柱、燒蟹、燒魚統統都唔使畀錢！咁筍？係噃，因為全部新鮮海鮮都要你自己落海捉。喺魚排附近，要搵鮮瑤柱、青口一啲都唔難。當你試過喺海中攞上嚟即燒即食嘅鮮瑤柱，嗰種鮮甜味道加埋嗰份滿足感，保證令你再三回味。

記者：馬慶武　攝影：陳智良
Models：Dennis、Giselle（SunSpot）
逢星期一至日出版

自從舊年政府批准開放魚排俾人釣魚之後，喺雞籠灣對開擁有一個魚排嘅吳先生已經諗住將魚排變身燒烤樂園，不過吳先生話𠵱家喺魚排上BBQ都重未合法，所以腦筋一轉就諗出先喺魚排釣魚捉海鮮，再到魚排對岸沙灘燒烤嘅燒烤團。有得玩有得食之餘，重有超新鮮嘅海鮮加料，即時將一餐普通嘅BBQ變成BBQ海鮮大餐。

海鮮多全靠水質好
喺西貢碼頭上船，經過15分鐘船程嚟到吳先生嘅魚排，藍天白雲四面環海，加上陣陣海水味飄埋身，真係勁好Feel勁舒服。「呢度離碼頭都幾遠，水質受污染程度極輕微，所以咁多新鮮靚海鮮。」吳先生話喺魚排附近好易捉到新鮮海鮮，咁啱嚟釣魚兼BBQ嘅小新立刻引證吳先生嘅說話：「我第一次嚟玩之嘛，落水無耐已經搵到好多鮮瑤柱同青口，你睇，多到食都食唔晒。」試過小新「請」我哋食嘅青口同鮮瑤柱，發覺除帶有淡淡海水味之外，味道真係超級鮮甜，落水濕身絕對值得。

■喺好淺水嘅海邊已經可以執到好多海星，吳先生重話可以帶返屋企煲湯，海星湯？真唔真呀？

■嚟釣魚兼BBQ嘅小新話有好多青口依附喺魚排度，一落水已經可以搵到好多，多到食唔晒。



海洋係最大寶庫
唔想落水「執」鮮瑤柱，可以喺魚排上垂釣，釣到新鮮魚燒一樣過癮，唔好彩釣唔到，都可以花幾十蚊買魚排內嘅鮮魚。捉夠海鮮魚穫，就可以叫吳先生揸船去對面沙灘開始海鮮BBQ大會喇，嚟到沙灘食晒燒豬扒、燒雞翼，食埋「加料」燒海鮮都唔夠飽，重可以落沙灘海邊執螺、蚌，雖然多數都係較細隻嘅螺仔蚌仔，但一樣鮮甜可口。「呢個沙灘有船先可以嚟到，水清沙幼，而且暫時只得我哋會嚟燒嘢食，所以可搵到好多螺同蚌，重會捉到海星同海膽。」吳先生見到Model們喺海邊捉海星玩，更不忘提佢哋玩完要放番啲海星落海：「保護環境好緊要㗎，應該盡量保護海洋生態，BBQ之後要執番晒啲垃圾，千祈唔好丟落海，如果唔係遲吓就無咁靚咁好味嘅海鮮捉㗎喇。」對吳先生嚟講，除魚排之外，最大嘅財富絕對係海裏面嘅海鮮。

■沙灘真係好荒蕪，吳先生會準備定幾塊大夾板畀客人墊住坐。如果想去廁所，惟有去草叢講句唔該借借喇。

■載客來回碼頭同魚排嘅快艇，可以用嚟玩Wakeboard，魚排亦有提供Wakeboard、救生衣等用具。平日收費$400/小時，星期六、日或假期$500/小時，比市價平百多元。

■喺魚排附近捉嘅鮮瑤柱足有3吋直徑咁大，肉質肥美。吳先生重話喺電視睇過蔡瀾教路，跟足佢加上少許Wasabi嚟燒，少少辛辣配合鮮瑤柱嘅超鮮甜味道，的確勁正。

■唔好誤會，喺魚排附近係搵唔到扇貝嘅，不過同樣可以預訂，吳先生話加啲薑葱嚟燒就最惹味。

■絲鱲魚喺魚排附近好易釣到，呢條差唔多10吋長嘅絲鱲就係Model們當日嘅戰利品。



食客兩句

■Dennis同Giselle食緊釣魚客小新喺海攞上嚟嘅青口，除咗燒有部份用滾水白灼，白灼肉質較韌，但係更有鮮味。



西貢雞籠灣海上釣魚樂園
上船地點：西貢碼頭
查詢電話：92523867（吳先生）
營業時間：10:00am-11:00pm
收費：星期一至五每位$138，星期六、日及公眾假期每位$158（BBQ食物1份、3罐飲品連釣魚）（若少於10位，需付來回船費合共$200）

Giselle：「我真係未食過咁鮮甜嘅鮮瑤柱同青口，嚟呢度BBQ，一定要落水攞啲新鮮海上鮮嚟燒，如果唔係就認真嘥料喇。」

Dennis：「雖然已經包埋雞翼、扒類等BBQ熱門食物，但係都係覺得啲海鮮先係主角，又可以落水玩吓，真係幾過癮。」