喺馬場碰到Ｙ局長，問佢：「Hi，經濟好轉喎，僱主聯會叫會員唔好加薪，點睇呀？」Ｙ局長只能苦笑、苦笑咁話：「經濟好，應該加吓薪嘅，唔好咁快勸人唔加薪！」打工仔加唔加薪，其實與Ｙ局長無關，不過僱主聯會咁高調，Ｙ局長點都要回應吓。
馬場之內，當然有好多僱主在場。老闆出口Ｓ話：「我都係唔多想加薪畀夥計，出口生意係好好，但過往經驗話畀我聽，薪水易加難降，加薪之時大家騎騎騎，減薪之時就喊苦喊忽，分分鐘嘈上勞工處，以致搵Ｙ局長。難得呢幾年薪水跌番落嚟，我就唔加番上去咯。今年賺多啲嘅話，我一定派花紅，補番畀夥計，但薪水就一於凍結。凍薪、派花紅，主動權在我，容易管理好多！」
站在老闆立場，出口Ｓ可能講出僱主心聲，根據呢幾年嘅情況做個總結，打工仔以後多數有花紅，冇加薪，大家計劃買樓買車以至供子女出外留學，財務策劃方面不妨保守一啲。
現時出口轉口暢旺，出口Ｓ等在珠三角設廠嘅行家，經常蓮子蓉咁面口，只係怕人民幣升值啫，但中央大力頂住，短期內一定冇問題（六個月至一年），長期嚟講，就要睇美國政治，假如明年布殊競選連任，無風無浪，佢唔會逼得中國太緊，最煩就係佢為咗選票，要整色整水，逼中國相就吓啫。