噚日國慶酒會，老董喺台上再次上晒身，大擦中央領導同廣東佬嘅鞋，聽到八方都肉麻，有心水清之人話，點解台上冇咗特區第二號人物煲呔曾？原來佢老哥因為條頸有事，依醫生囑咐要多啲休息，所以請假冇嚟，大家千祈唔好胡亂猜測，話有人對國家蓄意不敬，或者呢啲係落台先兆。
原來煲呔人在美國時，條頸已經痛得好厲害，返到香港睇醫生，照過之後，醫生話一定要做物理治療，因為已經影響到佢個背脊同埋隻手，分分鐘真係要戴頸箍。
煲呔嘅新聞秘書朱小姐解釋，煲呔條頸係積勞成疾，唔係喺美國扭親，亦唔係戴煲呔戴得太多年，箍親條頸，不過，由於要日日做物理治療，所以連去歐洲之行都要暫時押後，十幾個鐘頭飛機，梗係唔掂啦。
八方之前重話煲呔想做離岸政務司司長，點知煲呔揸頸就命，掃完街，都重憂患未了，條命真係苦。
（圖）煲呔（左）早上重好精神出席升旗禮，同唐英年有講有笑，點知到酒會時已經唔見咗人。
傳真︰2623-9278
電郵︰