估唔到九月尾，歐洲四大聯賽已經先後有領隊、教練被請食「豉椒炒魷」！其中當然以英超聯熱刺炒忠臣荷杜最哄動；不過西甲聯馬略卡呢兩季都算係威係勢，但都避免唔到要炒教練，都算令人意外！
繼德甲聯慕遜加柏率先炒咗教練連倫，然後到熱刺炒荷杜；上周聯賽後意甲聯安科納亦請教練文歷基尼食「無情雞」；噚日終於輪到西甲馬略卡炒咗柏查高。講起馬略卡，佢哋近季幾經人事變動，由前年威到打歐冠盃，跟住變成護級隊，上季又贏番個西班牙盃，點知今季又繼續喺聯賽榜下游浮沉，真係好似過山車咁，大上大落囉！
講開熱刺目前領隊位懸空，我求大俠講過塞黑籍嘅安迪好大機會做熱刺新帥，不過呢位曾執教馬體會及巴塞隆拿嘅有名教練，唔知係咪俾上季尾不獲巴塞隆拿續約一事影響，講明如果佢唔係熱刺最想要嘅人，就唔使搵佢傾嘞！呢啲係咪叫一朝被蛇咬，十年怕草繩呢？
我求大俠實在忍唔住要連續三日同大家講下李華度呢個「奇人」，奇在佢應承同AC米蘭解約後，又想留低多一陣；重奇嘅係佢分分鐘喺AC米蘭搶番個正選位，因球會應承再畀機會佢；更奇嘅係巴西國家隊繼續對佢不離不棄，已徵召呢位冇比賽好耐嘅球星備戰國際賽！
早排失蹤咗成個禮拜嘅捷克二十四歲中場施馬，終於喺日前蒲頭，向德甲漢諾威報到。雖然佢平安返嚟，但就話失去咗踢波嘅意欲，想同漢諾威解約㖭。季初佢打得好好，上陣六場入兩球一次助攻，稱得上係漢諾威嘅靈魂球員，如果雙方講唔掂數，睇怕漢諾威都幾頭赤。
日本今個月對突尼西亞同羅馬尼亞友賽，因是客場加上部份國腳要踢日本聯賽盃，統帥薛高決定召晒喺歐洲搵食球員入伍，除熱刺戶田和幸因傷落選外，連效力法國蒙彼利埃嘅廣山望都有份。我求大俠知道廣山望去過巴拉圭踢波，但一直不受國家隊重用，今勻實打爭氣波。