今個月十六號殺到本地嘅話題荷李活電影《標殺令》，前日就喺洛杉磯舉行首映禮，女主角奧瑪花曼（UmanThurman）同導演昆頓塔倫天奴（QuentinTarantino）都盛裝出席。雖然其他女演員好似VivicaA.Fox同DarylHannah都着到好惹火，但都搶唔走奧瑪同塔倫天奴嘅風頭。
奧瑪前日着件吊帶短裙出現，大騷修長嘅美腿。我大口羅拉收到風，奧瑪去年為咗生完BB之後復拍《標殺令》，用咗個好特別嘅方法收身。奧瑪喺產後日日只喺食雪榚、朱古力、布甸同鍾意嘅甜品，其他乜嘢都唔食，咁就減咗二十五磅。
我羅拉唔係營養師或者瘦身專家，當然唔知奧瑪咁樣減肥法對身體有冇壞處，不過，佢咁樣減肥，就一定可以過足口癮。雖然套片已經拍完，呢排奧瑪又面對婚變，但似乎冇影響佢喺首映嘅心情，佢着住條銀色裙，同塔倫天奴襯到絕。大家留意吓導演着黑色老西配銀色Puma波鞋，潮到爆。