劉慧卿去完台灣，今時今日重俾一班老本共集體蹂躪緊，點知呢頭卿姐未撲完火，個火已經燒到去城大。徐四民自資嘅《鏡報》月刊，十月最新嗰期登咗篇署名文章，除咗一貫重炮狂轟卿姐，竟然重大鬧城大好多年前出嘅一本、由張信剛大力推介、監學生必讀嘅《中國文化導讀》，話呢株毒草「暗藏着販賣台獨思想之玄機」，因為書入面有七幅中國地圖，都將台灣同大陸用唔同顏色區分，而海峽兩岸同色嘅地圖就只有一幅，而且又話一六八三年清軍佔領台灣，台灣先被納入中國版圖。
《鏡報》呢個辣手作者話，之前已經寫過信畀城大校長張信剛，重寫埋畀呢本書嘅四位北京大學教授同埋特區政府，但係都完全冇回應，結果佢自己出埋本書講《導讀》嘅問題，八方唔知佢老兄本書賣唔賣得，只係知道佢今次趁卿姐事件，舊事重提。八方噚晚同張文光傾開，覺得歷史應該屬學術研究，一幅地圖髹甩一塊色，都要拉要鎖，好彩23條通唔過。
傳真︰2623-9278
電郵︰