昨日為9月份最後1日，有啲季結活動，加上美股生性，恒指收復前市部份失地，升88點。國企股，尤其市值較大嗰批，氣勢較強。
滬杭甬（576）收4.375元，升10仙，創歷史新高，Call輪9748收89仙，升48%，做咗輪王，下月初夠鐘，溢價0.3%，槓桿率4.9倍，得5萬份成交，難做買賣。若然仍然睇好正股，可以揀9050，明年3月到期，輪價85仙，溢價6.3%，槓桿率5.2倍，數據算係咁。
佐丹奴Call輪9702升幅排第4，收43.5仙，升26%，明年1月到期，溢價5.4%，槓桿率8.1倍。正股（709）近期升幅唔細，要買9702，都係先等吓。
中企指數Call輪9048升幅排第6，收27.5仙，升17%，有68萬份成交。隻輪走勢同國企指數掛鈎，國企指數升1.95%，隻輪升幅放大8.7倍。同類Call輪共有7件，但一係槓桿率太細，得1倍幾，一係溢價過高，例如去到16%以上，冇9048咁實際。指數輪通常都有個毛病，就係冇法子即時睇到溢價與槓桿率等數據。吓吓要揸住張報紙睇數據，然後再用心計算即時指數與輪價變化，究竟啱唔啱數，太費神，唔係好多人鍾意，所以中企指數Call輪例牌成交唔多。
章 盛