期指結算過後，大市恢復升勢，恒指最高報11325，一度上升184點，其後回到11229收市，升88點，成交124億元。噚日除藍籌外，國企同二三線股都有好表現，升降指數亦改善，若上升層面繼續擴散，恒指有機會再向前高位11444水平挑戰。
早輪推介華晨（1114），當時股價2.475元，噚日衝破2.6元阻力，急升上2.725元，但基金可能仍未買夠貨，臨尾又出㩒價一招，結果都係收2.6元，「些那」掛到3至4球，咁嘅陣勢，明眼人都知係那一回事，只要股價能守穩在2.6元水平，下一次再衝，肯定見3字頭。華晨同寶馬合資生產的轎車，將於本月18日開始發售，首先推出寶馬3，繼而在下月中旬推出寶馬5系。
基金同大行睇好汽車股，除華晨外，駿威（203）亦係大手吸納對象，可能佢哋買貨量已有相當，所以急升後，都可以企高收。駿威噚日報4.7元，升0.175元，升幅3.8%，終於突破4.625元阻力，成交更大增至2377萬股，早輪芬佬睇5.2元，今個浪好大機會達到目標。
駿威中期業績有理想增長，03年度（12月年結）的上半年，營業額7.19億元，升9.5%，盈利6.74億元，升30%，每股盈利19.72仙，派中期息4仙。駿威盈利屬市場預期的上限，大行估計其下半年盈利可保持，全年每股盈利約40仙，預測PE11.7倍，維持其「中性」評級，跟大市上落。
駿威盈利主要來自聯營廣州本田的貢獻，稅前盈利7.4億元，升33%，期內轎車產銷分別為48424輛和48436輛，增加約72%和74%，雖然內地汽車市場競爭激烈，但公司提升產能，嚴控生產成本，儘管車價下跌，但銷量大增足以抵銷影響。
集團其他業務包括汽車貿易、零件及音響器材製造的毛利，則維持在去年同期的水平。
廣州本田在04年初可完成生產線升級，年產能力將達到24萬輛，對駿威盈利將可提供更大貢獻，估計駿威04年盈利可上升20%，每股盈利48仙，以持有6個月計，PE12倍，股價可見5.7元。
郭兆誠