蔡楓華噚日喺香港過完關返深圳嘅時候，咁啱撞到成班記者返內地採訪，自然成為各人追訪對象，眼前所見嘅蔡楓華恤衫、西褲再加手提皮包一個，同中環返工嘅寫字樓文員冇乜分別。不過，佢膊頭上面一點點嘅頭皮就完全破壞呢身造型，真係有礙觀瞻㖭。
蔡楓華話今次返去係有工作在身，不過做乜嘢就唔肯講喇，只係強調：「我係香港人所以重喺香港住。」佢一邊講一邊上車，唔清唔楚就上咗記者架旅遊車。雖然蔡楓華明知自己搭錯車，但仍然喺車上同司機擾攘咗成分鐘至肯落車，落咗車重要死撐話：「佢想搵我做代言人㖭。」最後要勞動到在場公安干涉先至告一段落。
容祖兒噚日大熱天時戴住頂絨帽、着住件絨衫去商台接受訪問，佢話已經入咗成十萬蚊冬裝，問佢係咪𠵱家着得密實啲，留番演唱會時先露身材，佢笑話等到時啲觀眾可以睇到嘩嘩聲。而佢重諗咗一個從商大計，諗住五年後開間「霸王餐」餐廳、「老馮」茶餐廳，以及「老餅餅店」做到好似連鎖店咁，不過睇嚟佢咁多諗頭，首要條件都係唔好買咁多衫儲錢先。
陳國邦同袁彩雲噚日喺將軍澳電視廣播城錄影無綫節目《橫掃千金》，陳國邦呢排日日返廣播城學南拳，佢話早前撞車令到頸椎骨移位，𠵱家都會痛，瞓覺時好易整親。至於袁彩雲就話經常主持啲飲食節目令佢有機會同啲大師傅偷師，連佢男友對食要求咁高嘅人有時都忍唔住讚佢喎。
李珊珊前晚去灣仔欣賞葉青霖嘅攝影展，呢個攝影展為《愛心滙聚耀世紀》籌款，李珊珊同葉青霖相識六年，交情好好，不過現場珊珊就好唔開心咁同記者講，因為自己早排一個唔小心，刪除晒的數碼相，入面有好多去旅行時影嘅相，最慘係同碧咸、奧雲影嘅合照都冇埋，咁又真係幾大打擊嘅。
李逸朗噚日喺商台接受訪問，佢話原本今日出碟，但因為印刷關係要延遲到今個禮拜五至出碟，不過新人嚟講，佢就真係好多嘢都唔識，佢叫大家幫幫手幫佢做宣傳等佢上港聞版頭條，當堂嚇到佢身邊嘅工作人員死死吓。梗係啦，香港藝人上親港聞都唔慌有好嘢，真係大吉利是。
古巨基噚日去咗探訪一班長者，為咗配合本月十二日嘅「祖父母節」，基仔帶咗張心意卡送畀班長者，佢重同全院最老嘅一百零七歲人瑞合照，其中有長者問基仔有份主演嘅《情深深雨濛濛》幾時重播，基仔就答：「呢啲無綫話事㗎。」基仔有份主演嘅《環珠格格III天上人間》先至俾人由黃金時段調去六點鐘播，你叫佢點答呀？
