已有十年健身經驗的Dickson，變身成為大隻佬的原因原來是不想再做「病君」。曾在九七至○一年度，四奪全港健美錦標賽七十五至八十公斤級別冠軍的Dickson表示：「我十五歲開始做Gym，好多人以為發育期間唔適合健身，但其實只要身高已經定咗，隨時可以開始做Gym。記得開始健身時，我身高同𠵱家一樣都係五呎七吋高，不過嗰時只得一百磅左右，身體虛弱，平時好多病痛。玩健身一兩年後，發覺自己嘅體質明顯好咗，心肺功能同體能都比以前強，最緊要就係冇咁多病痛。」
同樣有十年健身經驗、但至今年六月才首次參加健美大賽、並以二十六歲之齡奪得新秀賽冠軍嘅阿Fan，加入大隻佬行列的原因只得一個：「我偶像係李小龍。」
留有一把長髮的Fan回憶說：「我最欣賞李小龍嘅就係佢嘅『倒三角』（腹部兩邊的腹內外斜肌），真係好靚好perfect。為咗學佢，就下定決心開始做Gym。開始時都算幾瘋狂，我可以連續一年，風雨無間去『鐵館』玩健身；返到屋企，每晚深夜一點至三點我都會用啞鈴加操。大約玩咗兩年，我發覺除咗真係練到李小龍嘅『倒三角』，而其他肌肉線條更加超越李小龍，嗰種自豪感真係用錢買唔到。」
作風高調的Tommy劈頭第一句：「好多大隻佬都好低調，但我唔同，我鍾意着貼身衫同小背心；練到咁大隻，點解唔可以大方啲Show畀人睇。」
已有五年健身教練經驗的Tommy，直言大隻有助吸引異性的注意：「男仔一定要高大威猛，行出街自信心都好啲。記得有一次去Disco，有個女仔行埋嚟問我，『你咁大隻，可唔可以做我男朋友？』我話我已有女朋友，之後佢走開。我講呢件事唔係認叻，呢個係我嘅經歷，原來今時今日嘅女士們，已經唔再抗拒一嚿嚿肌肉嘅大隻佬，至少我女朋友係咁諗。」
