「人氣」豪宅新盤薄扶林貝沙灣，賣到停唔到手之餘，重吸引唔少明星去睇樓。同樣「人氣」強勁嘅女星張栢芝，噚日下晝兩點幾，一家大細去睇貝沙灣，唔知係咪早排賣咗間大埔康樂園之後想入市呢？不過，佢哋一行幾人，喺售樓處徘徊咗唔夠二十分鐘就離開。呢個星級盤都留低唔少名人商賈腳印，例如女藝人陳曼娜同樂蓓。
電盈噚晚為呢個銷售神速嘅豪宅盤搞慶功，邀請一大班勞苦功高嘅代理同高層，喺貝沙灣現址博物館慶祝。聽講，今次嘅祝捷會，除咗慶功之外，更加重要嘅目的係推介最後兩座，即係第二座同第八座單位嘅特色。二座主攻三房，八座主攻四房，透過代理穿針引線，供有興趣人士洽購。
另外，新鴻基地產喺鄰區嘅深灣軒，據聞女模特兒歐陽妙芝，今日會嚟睇樓。
發展商賣樓，唔一定要搵大型代理行，以世紀21為例，最近獲恒基地產邀請，參觀旗下多個豪宅新盤，包括重未開放過嘅大埔比華利山別墅。
世紀21今次嘅睇樓團，有超過六十人參加，反應重踴躍過啲內地睇樓團。佢哋特登去樓盤附近地勢較高嘅位置，俯瞰整個比華利山別墅，以便了解附近環境，日後向買家推介時就詳盡得多。
長和系噚日喺東莞為旗下樓盤搞路演，展覽場地廣東現代國際展覽中心，正舉行大型車展，多家車行都有擺攤位，展出最新款汽車，唯一由地產商擺放嘅攤位就只有長和系，唔通長和系有特權？
選擇喺汽車展覽會做樓盤推介，和記黃埔中國市務總經理譚健旭話，因為兩類貨品客源相近，可以產生互相吸客嘅作用，而和記黃埔係今次車展贊助商之一，所以特別厚待佢哋，可以喺場內開設攤位。譚健旭透露，贊助費逾四十萬，包括場地布置、接送服務同贊助禮品等。
長實東莞路演為期六日，由噚日起至十月五日。譚健旭講，展覽場館總樓面七十萬方呎，車展只用咗約三十五萬呎。舊年舉行同樣展覽，參觀人次有二十萬。
唔少人都知道，恒基地產營業部總經理張炳強為人風趣幽默，但就好少記得佢同時係善寧會嘅成員，對善終服務好熱心。
噚日，恒基喺中環某酒家搞記者會，主題當然係熱門話題嘅黃金周賣樓大計。點知，佢喺記者會之前同之後，好熱衷討論中國人對死亡嘅話題，後來重派發一份由善寧會同香港大學合作搞嘅問卷調查，足足有五頁紙，作為分析參考，內容係查詢市民對死亡嘅態度。
當勞（張嘅洋名）平時為人鬼馬，點知講到呢類話題，整個人都嚴肅起來。
戴德梁行一項調查顯示，香港係亞洲區三個最受基金歡迎嘅城市之一，外資入市首選寫字樓，其次係商舖同工業樓。
該行香港投資部董事方智傑話，港物業市場轉趨穩定，加上歐洲幣值高企，令外資轉向亞太區尋找出路，好自然會流入本港。佢估計，明年第一季因歐洲基金嚟香港，外資基金嘅入市行動會升級。
方智傑話，九八年，外資投資本港物業佔五成，𠵱家已降到約一成。新一輪嘅投資行動，除咗傳統嘅英、美同澳洲基金，新加入嘅將會有荷蘭同中東基金。
蘭西
電郵地址：
