劉嘉玲、陳冠希（Edison）及趙頌茹等，前晚出席《無間道II》首映禮，Edison與嘉玲暢談甚歡，而嘉玲提到掌摑Edison的戲份時，表示每次打完都會摸摸他的臉頰慰問一番，她又認為接吻鏡頭不夠激。
劉嘉玲、余文樂、陳冠希、趙頌茹及杜汶澤等，前晚於銅鑼灣時代廣場出席《無間道II》首映禮，戴着墨鏡的嘉玲以一身黑色衣服現身，造型有如黑社會大家姐一樣，她說：「呢一身無間道look，特登為首映買㗎。」嘉玲又透露梁朝偉因病未能捧場。而緋聞男女Edison及趙頌茹前晚不但全無交談，眼神接觸亦欠奉，與嘉玲反而有講有笑。
嘉玲提到戲中掌摑Edison的戲份時，她說：「我摑咗佢好多巴，差唔多有二十巴，我起初就住唔敢打，Edison好專業，佢同導演都叫我真打，我都覺得唔好意思，我每次打完佢都摸番佢塊面，問佢有冇事，佢都會話冇事，我會請番佢食飯補數。」至於Edison強吻嘉玲一幕，她說：「係有少少遺憾，剪完片睇嚟冇咁激。」嘉玲又謂與秋生的床戲其實只是在床上演戲，並非親熱鏡頭。
提到余文樂在戲中扮演年輕版偉仔，嘉玲說：「樂仔睇過《無間道》一百次，我都想睇佢嘅神韻似唔似，單睇樣就唔似囉。」問她是否覺得偉仔較靚仔？嘉玲笑說：「唔係，佢有佢靚。」前晚該片老闆林建岳、林百欣夫婦、MaggieQ、陳見飛及谷德昭等均有捧場，MaggieQ與林建岳見面即熱情擁抱打招呼，而陳見飛則拿着一個新款LV手提箱，頭頂一個早前陳文媛曾用的LV髮夾，她表示手提箱等都是陳冠希贈送的。
此外，曾志偉日前與Edison及余文樂到馬來西亞宣傳，被問到會否對《無間道II》票房有壓力時，志偉以國語說：「如果第二集的票房比第一集好的話，意思就是把梁朝偉及劉德華幹掉，我覺得票房有《無間道》的六成就很滿足，超過八成就已超越兩位影帝。」
採訪：陳梅香、何永寧
攝影：陳慧安、甄朝健
