期指結算日大市反覆走軟，恒指一度下跌186點，收市11141，跌148點，成交120億元，暫時仍可視為正常的技術性調整，10日線（11108）同20日線（11061）有初步支持；10月期指收11184，高水43點，情況未算太差。
同芬佬傾開，佢話香港𠵱家真係水浸，來自各地嘅熱錢繼續流入，所以大市只會調整，唔會大跌，佢哋亦預咗個市會調整1000點左右，入市嘅部署亦已計埋呢個因素，個別近期升得太急嘅股票，佢哋會㩒番低再買過，好似噚日嘅太A（019）同思捷環球（330），就係較明顯嘅例子，前者收45.3元，跌3%，臨尾見一波重係咁沽（上個禮拜好多大行枕住買）；後者收22.85元，跌4%，尾段掟散佢嘅沽家係一波同大摩。思捷主要市場在歐洲，美元弱勢，歐元強勢，對思捷好有利，估計美元若貶值5%，思捷的盈利可增6.5%，大行㩒價無非想買貨。
大市雖跌，但上升股（不計認股證）仍有200隻，創業板的蜂蜂天然生命（8156）收0.93元，雖只小升2仙，但由於走勢呈現突破，短線可以留意。蜂蜂去年11月中上市，之後股價大部份時間在0.5元至0.6之間上落，到上月11日，突然發力，股價在幾日之內，由0.55元飆升上1.0元水平，跟住出現調整，形成上升三角形，噚日低試0.85元後高收，衝破三角形阻力，今日成交若增加，新升浪即可確認，照度上去，目標指向1.4元。
蜂蜂主要經營蜂蜜產品，最近宣布03年度（6月年結）獲利1801萬元，每股盈利4.92仙，全年派息1.5仙。由於公司正處於急速擴展期，在6月年結時產能使用率由4成提升到8成，預計年底可飽和，屆時年產量將可由4000噸提升到6000噸，蜂蜜酒發酵工序亦可由15日減到12日，有助降低成本。
蜂蜂已有3年數，全部賺錢，相信公司好快會申請轉主板，對股價會有利好刺激。上個禮拜，由中資大行安排，公司在北京同上海「做騷」，業界反應甚佳，聽聞有一大陸及歐洲基金睇中蜂蜂，有意入股。有人計過，蜂蜂現年度盈利可倍增至3600萬元，每股盈利9.5仙，公司增長速，股價上升空間亦大。
郭兆誠