發展商賣樓，唔少得用專車接載準買家睇示範單位，𠵱家連入伙之後都有專車接送。
早前開賣嘅薄扶林貝沙灣一期，發展商提供名貴房車出租服務，一直以貝沙灣做定價參考嘅鴨脷洲深灣軒，新地增設另類專車接送服務，設有七人家庭車供租用，重可以有私人司機同跟車保母服侍，甚至畀埋旅遊路線，等住客同親友坐專車旅行，夠晒氣派。
新地代理總經理周國賢話，呢個「新派貴賓車」服務，住客可以透過電話或電郵預約，聘用私人司機，包括安排來往機場、接送小朋友上學、返補習班或興趣班及接載長者外出等。另外，更可安排保母跟車，照顧單獨坐車嘅長者或小朋友。
周國賢透露，暫時準備咗一部價值約四十萬嘅七人房車，提供呢項嶄新服務，有需要時，會增加車輛數目。至於收費，佢話係合理水平。
地產代理今個月生意興隆，中原陳永傑噚日急不及待報喜，香港住宅部佣金已經超過一億，本月埋單，有望達到一億二千萬，創五年新高。噚日翠濤居記者會請嚟九倉黃光耀一齊切蛋糕慶祝，黃先生笑話，起碼有一百萬佣金嚟自九倉樓盤。
中原重準備咗兒童飲品益力多做道具，同代理有乜關係呢？因為益力多有一百億活性乳酸菌，佢哋取其「一百億」嘅意頭，寓意公司營業額可以繼續升到一百億。祝酒儀式多數用香檳，今次順理成章改用益力多。
佢哋兄弟公司利嘉閣，今個月佣金收入已經有三千五百萬蚊，邁向四千萬。
天氣開始轉涼，政府提醒市民，沙士可能再度襲港，不少大公司為防患於未然，已經積極做預防工作。
蘭西聽希慎董事總經理利子厚講，佢哋旗下商場同寫字樓，已經準備咗一套應變計劃。今個禮拜開始，向租客講解同商討一齊合作，聯手防範沙士。
利子厚講番今年初沙士肆虐時，公司收到唔少商場租客要求減租，佢覺得最緊要係點樣令到商場環境安全，等租客同消費者覺得安心；其後，再喺復活節搞優惠活動，結果反應熱烈，租戶生意額大增。據講，最後商場都冇減租。
至於寫字樓，由於有租戶係醫務所，專登留咗一部𨋢畀佢嘅客戶專用，令大家出入安心得多。
發展商除咗捕捉明日十．一黃金周賣樓檔期外，連重陽節檔期亦唔放過。今個禮拜五，越秀投資夥同利嘉閣搞行山記者會，提早「登高」之餘，當然有重要目的，就係帶領一眾傳媒，睇吓佢哋嘅香港仔華富道八號新盤。
聽講行山路線由樓盤後面嘅薄扶林道開始，沿途種滿翠綠植物，可由山上眺望個樓盤，重可以欣賞樓盤前方嘅海景。呢個活動有心思之餘，又夠健康，兼且應節。
蘭西
電郵地址：
